Agam 03 Ang 03 Sthanang Sutra Mool Sthanakvasi

Author(s): Sudharmaswami, Devardhigani Kshamashaman
Publisher: Global Jain Agam Mission

Page 173

ठाणांग सुत्तं
मणुण्णाइं मे सद्द जाव अवहरिस्सइ । अमणुण्णाइं मे सद्द जाव उवहरिस्सइ। मणुण्णाइं मे सद्द जाव अवहरिंसु वा अवहरइ वा अवहरिस्सइ वा । अमणुण्णाइं मे सद्द जाव उवहरिंसु वा उवहरइ वा उवहरिस्सइ वा | मणुण्णामणुण्णाइं मे सद्द जाव अवहरिंसु वा अवहरइ वा अवहरिस्सइ वा, उवहरिंसु वा उवहरइ वा उवहरिस्सइ वा। अहं च णं आयरिय-उवज्झायाणं सम्मं वट्टामि, ममं च णं आयरिय-उवज्झाया मिच्छं विप्पडिवण्णा । दसविहे संजमे पण्णत्ते, तं जहा- पुढविकाइयसंजमे, आउकाइयसंजमे, तेउकाइयसंजमे, वाउकाइयसंजमे, वणस्सइकाइयसंजमे, बेइंदियसंजमे, तेइंदियसंजमे, चउरिंदियसंजमे, पंचिंदियसंजमे, अजीवकायसंजमे । दसविहे असंजमे पण्णत्ते, तं जहा- पढविकाइयअसंजमे जाव वणस्सइ-काइयअसंजमे, बेइंदियअसंजमे जाव अजीवकायअसंजमे । दसविहे संवरे पण्णत्ते, तं जहा- सोइंदियसंवरे, चक्खिंदियसंवरे, घाणिदिय-संवरे, जिब्भिंदियसंवरे, फासिंदियसंवरे, मणसंवरे, वयसंवरे, काय संवरे उवगरण-संवरे, सूचीकुसग्गसंवरे । दसविहे असंवरे पण्णत्ते, तं जहा- सोइंदियअसंवरे जाव फासिंदियअसंवरे, मणअसंवरे, वयअसंवरे, कायअसंवरे, उवगरणअसंवरे, सूचीकुसग्गअसंवरे । दसहिं ठाणेहिं अहमंतीइ थंभिज्जा, तं जहा- जाइमएण वा, कुलमएण वा जाव इस्सरियमएण वा, णागसुवण्णा वा मे अंतियं हव्वमागच्छंति, पुरिसधम्माओ वा मे उत्तरिए आहोहिए णाणदंसणे समुप्पण्णे । दसविहा समाही पण्णत्ता, तं जहा- पाणाइवायवेरमणे, मुसावायवेरमणे, अदिण्णादाणवेरमणे, मेहुणवेरमणे, परिग्गहवेरमणे, इरियासमिई, भासासमिई, एसणासमिई, आयाण-भंडमत्तणिक्खेवणासमिई, उच्चार-पासवण- खेल- सिंघाण- जल्ल-पारिट्ठावणिया समिई । दसविहा असमाही पण्णत्ता, तं जहा- पाणाइवाए जाव परिग्गहे, इरिया असमिई जाव उच्चारपासवण-खेल-सिंघाण- जल्ल-पारिट्ठावणिया- असमिइ ।
दसविहा पव्वज्जा पण्णत्ता, तं जहा- छंदा, रोसा, परिजुण्णा, सुविणा पडिस्सुया सारणिया, रोगिणिया, अणाढिया. देवसण्णत्ती
६
दसविहे समणधम्मे पण्णत्ते, तं जहा- खंती, मुत्ती, अज्जवे, मद्दवे, लाघवे, सच्चे, संजमे, तवे, चियाए, बंभचेरवासे।
168