________________
उन्नामिअ-भुमयाए भण्डारे पाहुडाइ पेंडविरो । नरवइ-पट्ठविआई देवय-पट्ठाविआई च ॥२५॥ वोक्कंत-महामच्चो निवो अवुक्कंत-पणइ-मंडलिओ । विण्णत्ति-दिन्न-कण्णो अहिट्ठिओ कणय-मंडविअं ॥२६॥ पणमिर-पणइ-पणामिअ-दिट्ठी सो तत्थ अल्लिविअ-हरिसो । अणचच्चुप्पिअ-हिअओ अप्पिअ-निव-खोहमासीणो ॥२७॥ जाविअ मुहत्तमेगं पुरोहिओ जविअ-दुट्ठ-कलि-ललिओ। दंत-रुई-ओम्वालिअ-गयणो उच्चारही मंतं ॥२८॥ हार-प्पह-पव्वालिअ-हिओ निवो पाविओ व्व अमएण । पक्खोडिअ-चमराहिं विकोसिअच्छीहि उवसरिओ ॥२९॥ ओग्गालिर-वसहाणं वग्गोलिर-करहयाण वारम्मि । रोमंथ-भंग-जणणो अहासि गंभीर-तूर-रवो ॥३०॥ णव्वंतो सिरि-णिहवय-सिरिमम-कायम-सिरि पयासंतो । विच्छोलिअ-भुमयाहिं राया विलयाहि परिअरिओ ॥३१॥ अणकंपिर-कर-वलिअ-त्थाले आरोविउं अदोलि-सिहं । रंखोलिर-ताडंका वर-विलयारत्तिअं काही ॥३२॥ जण-रज्जणेहि राविउमुव्वीसं तत्थ पणमिर-निवेहि । परिवाडिअंजलीहिं खे घडिआ कमल-कोस व्व ॥३३॥ कणय-परिआलिएहिं रयणाहरणेहि वेढिअंगुलिआ । विकिणण-किणण-छइल्ला पुरो निविट्ठा महाजणिआ ॥३४॥ विक्केंतोद्धरिआ इव भायंता अवि अबीहिरा निच्चं । भीएहि सहचरेहिं निव-दुआ दूरमल्लीणा ॥३५॥ भत्ति-णिरिग्घिअ-हिअआ मउलि-णिलीअंत-पाणि-संपुडया । निव-पय-कमल-णिलुक्कंत-लोअणा सा सहा आसि ॥३६॥
आसि मणि-वेइआसु लुक्कंतो मणि-महीएँ लिक्कंतो । ल्हिक्कन्तो मणि-थम्मेसु सय-गुणो पडिकिदीइ जणो ॥३७॥ निवइ-निलीइर-नयणा अविराय-सिरी विलीइर-जुआणा । अलि-रुजिअ-जइ-रुटिअ-किंकिणि-नीवीउ आसीणा ॥३८॥
११२
