________________
सामिय ! दूसणकलिया जं अहं परिचत्ता तं तु जुत्तं, किंतु अन्नाहिं अंतेउरिहिं किं अवरद्धं जं एआओ चयसि ? अहवा नायं, सुरसुंदरीए सद्धि बहुविहविलासरसियस्स तुह अम्हारिसीणं नामं पि गहियं रई न कुणेइ । तव्वयणेण चमक्कियचित्तो राया तं निरूविऊणं पुणो य सम्म उवलक्खिऊण भणेइ तं किं ? एयं किं ? ति – तत्तो नमिऊण तीए नरिंदो भणिओ – मए जोइणीवयणेण जो अविणओ कओ । सो नाह ! तुमए खमिअव्वो । हरिसविसाय-अच्छेरयपरिपूरियमाणसो नरवई तं बुद्धिमई चंदलेहं देवीपयम्मि ठवेइ – भणियं च -
ता गव्वो ता रसो, तावच्चिय पुव्वदोससंभरणं ।
उक्कीरीउ व्व हियए, जाव चहुटुंति नेव गुणा ॥ अह सयलंतेउरकलिओ पायालघरम्मि विविहभंगीहिं भोगभोगाइं भुंजमाणो वसुहाहिवई वरिसाणं सहस्साइं वइक्कमेइ ।
अह अण्णया नंदणवणसरिसे कुसुमागरनामम्मि उज्जाणम्मि सिरिअभयंकरसूरी साहुगणपरियरिओ समोसढो । दुल्ललियनरिंदो उज्जाणम्मि समागयं सूरिं वियाणिऊण साणंदो चंदलेहाजुओ तहिं गंतूणं आयरियं पणमिऊणं उवविसिऊणं धम्मकहं सुणेइ -
जयसिरिवंछियसुहए, अणिठ्ठहरणे तिवग्गसारम्मि ।
इह परलोयहियटुं, सम्मं धम्मम्मि उज्जमह ॥ मज्जविसयकसायनिद्दाविकहापमुहपमाए चइऊणं जयसिरिवंछियसुहकारणे सारीरमाणसियदुक्खदालिद्दाइअणिट्ठहरणे य तिवग्गसारम्मि धम्मम्मि इहपरलोयहियट्ठाय सम्मं उज्जमेह । तहाहि - विसमं विसं उवभुंजिउं सेयं, अग्गिणा सह कीलिउं समत्थो होज्जा, तहवि संसारकारागारगएहि जीवेहिं पमाओ न कायव्वो, जओ विसं अग्गी वा आसेविओ तीए चेव जाईए नरं उवहणेज्जा, पमाओ उ जम्मंतरसयाइं हणेज्जा । तम्हा पमायं सव्वहा चइऊणं देसविरइसव्वविरइसरूवधम्मस्स मूलाइभूए सम्मत्तदंसणम्मि सइ उज्जमो कायव्वो ।
एयं चेव धम्मतरुणो मूलं, धम्मपुरस्स दुवारं, निव्वाणपासायस्स पीढिगा, सव्वसंपयाणं निहाणं, रयणाणं पिव सागरो तह गुणाणं चिय आहारो, चारित्तधणस्स पत्तं सम्मत्तं केहिं न सिलाहिज्जइ ? तम्हा भो ! भविया ! पमायमज्जं चइत्ता सिवसोक्खदायगं दुट्ठकम्मविणासगं सुद्धं सावगधम्मं गिण्हेह । परतित्थम्मि गयाणं जेसिं पुरिसाणं मरणम्मि उवत्थिए सम्मत्ताराहणरागो होइ ते वि हि सिग्धं भवजलहिं तरिऊणं सिवसुहं पावेइरे ।
१. उत्कीर्णा इव ॥ २. लगन्ति - चोटवू ॥ ३. समवसृतः ॥ ४. श्रेयः ।।
७६
