Page Text
________________
134 जितेन्द्र शाह
SAMBODHI केरिसो चोरो ? आणीओ भिच्चेहि पणामं काऊण उवविट्ठो रायपुरओ, राइणा पलोइओ सोमदिट्ठिए भणियं च-अहो महादड्डसं कयं महासत्त ! कहं पविट्ठो मज्झ भवणे ? चिंतियं वंकचूलेणं-अहो अलंघणिज्जा एस, वंकचूलेण भणीयं-देव ! गोहारज्जूएण चडिओ । अत्थकारणेण निविन्नो खत्तखणेणं एवं चिंतिऊण तुह भवणे पविट्ठो किर रयणाई लहिस्सं महग्घमूलाणि । ता देवी दिट्ठो, एयं नाउं जो रुच्चइ निग्गहं करेह । राएण भणियं-वरं ते देमि महासत्त ! सव्वंगसुंदरंगासव्वालंकारभूसियसरीरा जा दिट्ठा मह भज्जा आसि तया अग्गमहेसि त्ति । वंकचूलेण भणियं-देव ! जा तुज्झ पढमा अग्गमहिसी सा मह माया जाणरिया, जइ देसी अन्न महिला तो सा गिण्हामि देव वयणेण । एयस्स य पुण नियमो जावज्जीवं न संदेहो । भणियं च नरवइणा-भो भो ! सेणावई ! मारेह दुट्ठचोरो, जइ न इच्छइ गिण्हिउं भज्जा सूलाए भिंदह। तहा वि न इच्छइ महासत्तो । पुणो पुणो भन्नमाणे वि य अइसे निच्छओ दढसत्तो नाऊण चिंतियं नरवइणाजह मह सगासे स जीवंतो पयत्तेणं । एवं मन्निऊण नीओ बाहिं नयरस्स मज्झेणं जेउ मसाणं सूलाए ढोइओ सो भणिओ तया वि न इच्छइ महासत्तो । पुणो पुणो भेसिज्जंतो वि दढसत्तो गुरूवयणं अणुसरंतो न इच्छइ मे भज्जा पडिवज्जेउं । नाऊण निच्छिओ से आणिओ रायसगासे । राएण साहुकारो दिन्नो । अहो अहो ! महासत्तो कुमारो । अहिसित्तो कलसेहिं ससुयं सलिलं पुन्नेहि वरवत्था-भरणविभूसिओ विदिन्नछत्त-चामरो दिनो से आवासो । कंस-धण-धन्न-पडिपुन्नो दिन्ना बारस गामा, पडिवन्नों पढमपुत्तो त्ति, सा भगिणी भज्जा वि दुन्नि वि आणावियाओ भवणे अच्छंति सभिच्चपरिवारो । अन्नया चिंतियं ।
धन्नोहं कयपुन्नो मज्झ सुलद्धं च माणुसं जम्मं ।
जं दिन्ना मह नियमा साहूहिँ महाणुभावेहिं ।१। जइ पिच्छामि सो भगवं आयरिउं परमगुरू मज्झं जस्स पसाएणं इह विभूइपत्तो करेमि जिणधम्मं । दुक्खखयकारणट्ठाए जाव इच्छइ चिंतंतो ताव तहिं आगया साहु, विगयं पावा आवासिया उज्जाणे । सोऊण वंकचूलो निग्गओ वंदणवडियाए सभिच्चपरिवारो । दिट्ठो य साहुणा वंदिया पायाए परमाए भत्तीए । अणुकम्मेण वंदिऊण भणिया 'भयवं ! अज्ज पडिवन्नो जिणधम्मो अहिंसाइलखणो इहेव परभवे वा सुहमुक्खदायगो ता देहि भयवं ! अणुव्वयाणि । गिहिधम्मो पालेमि पयत्तेणं । दिन्नाणि आयरिएहिं अणुव्वयाणि । आयरेण गहियाणि परमाए भत्तीए पाणिवहाओ अलियवयणाओ परधणहरणं परदारमगमणं च । परिग्गहपरिमाणं राइभोयणविरयं च । एयाहिं नियमो लइओ वंकचूलेण । पडिवन्नं सम्मत्तं निरवसेसं जिणवंदणनमंसणेहिं वच्चंति से दियहा तग्गयधम्ममणो साहम्मियवच्छल्लो गुरुसुस्सू परो अनन्नदेवया परमसावगो जाओ।
तहिं च उज्जेणीए आसन्नो सालीगामो । तहिं च जिणदासो नाम सावगो जिणसासणरओ परिवसइ । सो उज्जेणीए आगओ गुरुवंदणाए, वंदंतो परमाए भत्तीए दिट्ठो वंकचूलेणं । भणियं च–सुसागयं भो वरमित्त ! एहि मह भवणे । नेऊण दिव्वाहारभुत्ताविओ भुत्तावसाणे दिन्नं सेयं वरवत्थजुयलयं सुहदुखं जंपिऊण गओ सालिग्गामं जं परितुट्ठो भज्जाए कहियं । एवं वच्चइ कालो ।
Jain Education International
For Personal & Private Use Only
www.jainelibrary.org
| SR No. | 520774 |
| Book Title | Sambodhi 2001 Vol 24 |
| Original Sutra Author | N/A |
| Author | Jitendra B Shah, K M Patel |
| Publisher | L D Indology Ahmedabad |
| Publication Year | 2001 |
| Total Pages | 162 |
| Language | English, Sanskrit, Prakrit, Gujarati |
| Classification | Magazine, India_Sambodhi, & India |
| File Size | 4 MB |