________________
April-2003
5
सम्मत्तसुद्धिसुरवल्लिसुलद्धिधन्नो, आया सुही जह य विक्कम-वज्जकण्णो । मिच्छत्तमोहपिसुघायपवड्डमाणो, आया दुही जह तिविक्कमगाभिहाणो ॥२४॥ दाणं तवोवहाणं धम्माणुट्ठाण नाण झाणं च । पोसह-पडिमाठाणं विणु सम्मत्तं तमण्णाणं ॥२५॥ मूलं सव्वसुहाणं सव्वगुणाणं निहाण सिवजाणं । पावियसग्गविमाणं, सम्मत्तं धरसु अनियाणं ॥२६॥ (द्वारं ३) || कारणरहियं कज्जं न होइ इय जाणिऊण रे जीव । धम्मो सव्वसुहाणं बीयमबीए कहं रमसि ? ॥२७|| जो पुव्वजम्मकयरम्मसुधम्मकम्मो, आया भवे धणसमिद्धकुमारसम्मो । संगामसूरनिवबोहणवुत्तधम्मो, सो होइ सुत्तसुरलोयसुहाण मम्मो ॥२८॥
(द्वारं ४)॥ गुणओ समसुहभुत्ती सव्वपयत्थाण होइ पडिवत्ती । गुण[ओ] लोए कित्ती, कायव्वा तेण गुणसित्ती ॥२९॥ जह उवसमरस खंती गुणसेणणिवस्स सव्वगुणमित्ती । मणवयणकायगुत्ती, कायव्वा तेण गुणवित्ती ॥३०॥ आया सुही अयलजंतुसुहप्पयाणो, सीहो जहा अमरगुत्तचरित्तनाणो । आया सुही भवइ वा परमप्पझाणो, दिटुंतओ अमरगुत्तमुर्णिदझाणो ॥३१॥
(द्वारं ५) ॥ जोगी जए सकहमित्थ न जो सजोगं, संजोइऊण जगजंतुविचित्तरूवं । चित्ते वियारयइ सुत्तवियारपुण्णो, सोऊण जो सिहिकुमारसमं न भिन्नो ॥३२॥ दव्वेण खित्तेण य कालएणं, भावेण एगिदियपंचयाणं । तहा सरूवं विगलिंदियाणं कारुण्णओ पस्स विडंबणं च ॥३३॥ तिरिक्खपंचिंदियमाणुसाणं, तहा सरूवं च विचित्तयाओ । देवाण वा पस्स विचित्तरूवं, सज्झायकारुण्णगओ सुजीव ! ॥३४॥
Jain Education International
For Private & Personal Use Only
www.jainelibrary.org
