________________ અંતકૃદશાંગ સૂત્ર-૧ ગત શ્રીઉપાસકદશાંગ સૂત્રમાં દશ મહાશ્રાવકોના જીવનની વાતો હતી. હવે શ્રી અંતર્દશાંગ સૂત્ર નામના આ આઠમા અંગ આગમમાં શ્રમણજીવન સ્વીકારનારા આત્માઓની જીવનકથા છે. કથાનુયોગમાં સમાવેશ પામતા આ આગમમાં તે મહાપુરુષોની જીવનકથા છે, જેઓએ સંયમ અને તપશ્ચર્યાના બળે આઠ કર્મોને જીતી સંસારનો અંત કર્યો છે. કેવળજ્ઞાન પામી માત્ર અંતમુહૂર્તમાં મોક્ષને પામનારા 90 આત્માઓના જીવનને વર્ણવનારા મુખ્ય આઠ વર્ગ છે. એક-એક વર્ગમાં ક્રમશ: દશ, આઠ, તેર, દશ, દશ, સોળ, તેર, દશ એમ નેવું (90) અધ્યયનો છે. મૂળ શ્લોક 850 છે. ટીકાકારમહર્ષિ પૂ.આ.શ્રી અભયદેવસૂરિ મહારાજાનું લઘુ વિવરણ 400 શ્લોક પ્રમાણ છે. એમ વર્તમાનમાં કુલ 1250 શ્લોક પ્રમાણ સાહિત્ય ઉપલબ્ધ છે. 90 સાધકોમાંથી એકાવન (51) સાધકો બાવીસમા તીર્થપતિ શ્રી નેમિનાથ પરમાત્માના શાસનમાં થયેલા છે. જેમાં શ્રી કૃષ્ણ વાસુદેવના દશ કાકા, પચીશ ભાઈ, આઠ પત્ની, બે પુત્ર, બે પુત્રવધૂ, ત્રણ ભત્રીજા અને એક પૌત્ર છે. બાકીના ઓગણચાલીશ (39) સાધકો ચોવીસમા તીર્થપતિ શ્રી મહાવીર પરમાત્માના શાસનમાં થયેલા છે. 62 || આગમની ઓળખ
