________________
વિવેચન :- મિથ્યાત્વગુણસ્થાનકથી પ્રમત્તગુણસ્થાનક સુધી છ લેશ્યા હોય છે પણ નીચેના ગુણસ્થાનકેથી ઉપરના ગુણસ્થાનક તરફ જતાં જેમ જેમ વિશુદ્ધિ વધતી જાય છે. તેમ તેમ અશુભલેશ્યા વધુને વધુ મંદ થતી જાય છે અને શુભલેશ્યા વધુને વધુ તીવ્ર થતી જાય છે અને પ્રમત્ત ગુણસ્થાનકેથી નીચે ઉતરતા જેમ જેમ સંક્લિષ્ટતા વધતી જાય છે. તેમ તેમ અશુભલેશ્યા વધુને વધુ તીવ્ર થતી જાય છે અને શુભલેશ્યા વધુને વધુ મંદ થતી જાય છે. એટલે શુભાશુભપરિણામની તરતમતાને કારણે એક-એક લેશ્યાના અસંખ્યલોકના આકાશપ્રદેશ જેટલા અધ્યવસાયસ્થાનો છે. તેથી મિથ્યાત્વગુણસ્થાનકે અશુભલેશ્યા તીવ્રતમ અને શુભલેશ્યા મંદતમ હોય છે તથા પ્રમત્તગુણસ્થાનકે અશુભલેશ્યા મંદતમ અને શુભલેશ્યા તીવ્રતમ હોય છે.
અપ્રમત્તગુણઠાણે (૧) તેજો, (૨) પદ્મ, અને (૩) શુક્લલેશ્યા જ હોય છે. અશુભલેશ્યા ન હોય. કારણકે ત્યાં આર્તધ્યાન કે રૌદ્રધ્યાન ન હોવાથી અશુભપરિણામ હોતો નથી. તેથી અશુભલેશ્યા ન હોય. અપૂર્વકરણગુણસ્થાનકથી સયોગીગુણસ્થાનક સુધી એક જ શુક્લલેશ્યા હોય છે અને અયોગીગુણઠાણે એકે ય લેશ્યા હોતી નથી.
કર્મબંધના હેતુ :(૧) મિથ્યાત્વ
વિપરીતશ્રદ્ધા
સર્વજ્ઞભગવંતે જે વસ્તુ જે સ્વરૂપે કહી છે. તે વસ્તુ તે સ્વરૂપે ન માનવી પણ તેનાથી વિપરીત સ્વરૂપે માનવી, તે મિથ્યાત્વ કહેવાય છે. દા.ત. કુદેવને સુદેવ માનવા, કુસાધુને સુસાધુ માનવા. અને અધર્મને ધર્મ માનવો, તે મિથ્યાત્વ કહેવાય છે.
=
૨૦૧
