________________ સાહિત્ય, શિક્ષણ, પત્રકારત્વ અને ધર્મદર્શનના ક્ષેત્રે યશસ્વી કામગીરી કરનાર શ્રી કુમારપાળ દેસાઈએ સિત્તેર જેટલાં પુસ્તકોનું સર્જન કર્યું છે. એમનાં નવ પુસ્તકોને રાષ્ટ્રીય કે રાજ્યકક્ષાનાં પારિતોષિક મળ્યાં છે. ગુજરાત યુનિવર્સિટીના ભાષા-સાહિત્ય ભવનના અધ્યાપક કુમારપાળ દેસાઈ ‘ઈટ અને ઇમારત’, ‘ઝાકળ બન્યું મોતી’, ‘પારિજાતનો પરિસંવાદ’ અને ‘આકાશની ઓળખ’ જેવા લોકપ્રિય કૉલમોના લેખક છે. પચ્ચીસેક વાર વિદેશપ્રવાસ ખેડી સાહિત્ય, સંસ્કૃતિ અને ધર્મદર્શન વિશે પ્રવચનો આપ્યાં છે. ઇન્સ્ટિટ્યૂટ ઑફ જૈનૉલોજીના કો-ઓર્ડિનેટર, ગુજરાત વિશ્વકોશ ટ્રસ્ટના ટ્રસ્ટી તથા અન્ય સંસ્થાઓમાં કાર્યરત એવા કુમારપાળ દેસાઈને તાજેતરમાં માનવીય મૂલ્યો અને ભારતીય સંસ્કૃતિ માટે શ્રી દિવાળીબહેન મોહનલાલ મહેતા એવોર્ડ એનાયત કરવામાં આવ્યો.
