Page Text
________________
ઉત્તમભાઈ સ્વભાવથી જ ઓછાબોલા. જરૂર પૂરતા જ શબ્દો વાપરે. પરંતુ એમને વેપાર અને ઘરની એકેએક બાબતોનો ખ્યાલ હોય. આથી જ અનિતાબહેનને આશ્ચર્ય થતું કે ઘરની કોઈ પણ બાબતમાં સીધે સીધો રસ નહીં દાખવનારા ઉત્તમભાઈની નજરમાં ઘરની રજેરજ માહિતી કેવી રીતે રહેતી હશે ! | ઉત્તમભાઈને પાછલાં વર્ષોમાં ઘરમાં રહેવું પડ્યું અને એ સમયના ઉત્તમભાઈનું સ્નેહાળ ચિત્ર એમનાં પુત્રવધૂ સપનાબહેન પાસેથી મળે છે. તેઓ રોજ સવારે થોડું ફરતા. ભોજનની બાબતમાં ઉત્તમભાઈની ચીવટ ઘણી. સવારમાં બે ખાખરા અને દહીં-દૂધ લેતા હતા. બપોરે બરાબર એકના ટકોરે રોટલી, શાક, સલાડ, પાપડ, દાળ અને ભાત લેતા હતા. સાંજના ભોજનમાં બે તીખા અને બે મોળા એમ ચાર ખાખરા હોય, પાપડ હોય. એક કપ દૂધ અને ફૂટજ્યુસ હોય. જોકે છેલ્લાં ત્રણ વર્ષથી સાંજના ભોજનમાં બે નાની ભાખરી લેતા હતા.
ઘરમાં પણ ઉત્તમભાઈની વાચનયાત્રા સતત ચાલુ જ રહેતી. બાળકો સાથે એ બુખારો નામની પત્તાની રમત રમતા હોય. ક્યારેય કોઈ બાળકોને ધમકાવતા હોય તો ઉત્તમભાઈ કહે કે આવી રીતે એને જોરથી કશું કહેવું નહીં. બાળકોને ગમે તેવું કરવું. એ માગે તે આપવું. આવી બાબતોમાં આપણે બહુ આગ્રહ રાખવો નહીં.
ઘરમાં કોઈ બીમાર પડે એટલે ઉત્તમભાઈ એમની સઘળી સારવારમાં લાગી જતા. એના મેડિકલ રિપોર્ટ ભેગા કરે, ડૉક્ટરોને ફોન કરી એમને બોલાવે. ઉત્તમભાઈના પૌત્ર અમનનું હર્નિયાનું સાવ સામાન્ય ઑપરેશન હતું, પણ તેઓ સવારથી બપોર સુધી હૉસ્પિટલમાં બેઠા હતા. વળી સાંજે પણ આવીને આંટો મારી ગયા હતા. આવી જ રીતે એમનો પૌત્ર વરુણ થોડો લાંબો સમય બીમાર રહ્યો ત્યારે ઉત્તમભાઈ રોજ એક નવા ડૉક્ટરને લઈ આવતા હતા
અંતિમ વર્ષોમાં પણ તેઓ વ્યવસાયની માહિતી મેળવતા રહ્યા. ઘેર બેઠા બેઠા પણ વ્યવસાયના રિપોર્ટ મંગાવતા રહેતા, એનો અભ્યાસ કરતા. જરૂર લાગે તો જે તે વિભાગના અધિકારીઓને પૂછતા પણ ખરા. સપનાબહેનની ટ્રાવેલ સંસ્થા વોયેજર'ના દર મહિને રિપૉર્ટ મંગાવતા. કઈ ઍરલાઇન્સમાં કેવી ડિસ્કાઉન્ટની સ્કીમ ચાલે છે તેની પણ માહિતી પૂછતા. આ રીતે માત્ર પોતાનામાં સીમિત રહેવાને બદલે ઉત્તમભાઈ પરિવારની વ્યક્તિ બની રહેતા હતા.
છેલ્લા સમયમાં ટોરેન્ટ દ્વારા માનસિક રોગની ડિપ્રેશન માટેની એક નવી દવા ‘લોઝાપિન' (Lozapin) બજારમાં મૂકવામાં આવી. આ એમના રસનો વિષય હતો, આથી રોજ ત્રણ વખત ઘેર હોય તો પણ એ દવાના વેચાણ અંગે પૃચ્છા કરતા. એને માટે એમણે ઘણાં લોકોને દોડતા કરી દીધા હતા. 220
| SR No. | 032342 |
| Book Title | Aafatoni Aandhi Vachhe Samruddhinu Shikhar U N Mehtanu Jivan Charitra |
| Original Sutra Author | N/A |
| Author | Kumarpal Desai |
| Publisher | Torrent Limited |
| Publication Year | |
| Total Pages | 242 |
| Language | Gujarati |
| Classification | Book_Gujarati |
| File Size | 10 MB |