Page Text
________________
આવવા કહ્યું. ડૉ. અડવાણીએ તમામ રિપોર્ટ વિગતે તપાસ્યા પછી કહ્યું કે આમ તો ઉત્તમભાઈની તબિયત સારી લાગે છે. રોગનાં કોઈ બાહ્ય ચિહ્નો જણાતાં નથી, તેમ છતાં તાતા હૉસ્પિટલના ડિરેક્ટર અને સર્જન પાસે બાયોપ્સી કરાવી લેવી હિતાવહ છે. ડૉ. અડવાણીએ બપોરે બે વાગે એ સર્જન પાસે સમય માંગ્યો અને એમણે સાંજના છ વાગ્યાનો સમય આપ્યો. સમીરભાઈ તરત જ ઉત્તમભાઈ રહેતા હતા તે મુંબઈના વૂડલૅન્ડ ફ્લેટમાં આવ્યા અને છ વાગ્યે એ સર્જનને બતાવવા જવાની વાત કરી.
ઉત્તમભાઈને એમના વ્યવસાય અર્થે અને સ્વાથ્ય અંગે સતત ડૉક્ટરોના સંપર્કમાં રહેવું પડતું. ડૉ. બગડિયા કે ડૉ. ભણશાળી જેવા ખ્યાતનામ ડૉક્ટરો સાથે એમને નિકટનો નાતો બંધાયો હતો. ડૉ. લ્યુકસ કે ડૉ. લેવિન જેવા હજારો માઈલ દૂર વસતા ડૉક્ટરો પાસેથી લાગણી અને સ્નેહ સાંપડ્યાં હતાં. પરંતુ આ બધાંથી એક જુદો જ અનુભવ આ સર્જનનો થયો.
એ સર્જનને માટે એમ કહેવાતું કે તેઓ ખૂબ વ્યસ્ત ડૉક્ટર છે. એમણે માત્ર એક જ મિનિટમાં ઉત્તમભાઈને કહી દીધું કે તમારે બાયોપ્સી કરાવવાની જરૂર નથી. એમણે ઉત્તમભાઈની કોઈ વાત સાંભળી નહીં. એમ.આર.આઈના રિપોર્ટ જોયા નહીં. એમને ઉતાવળ એટલી બધી હતી કે એમને કહેવાનો કોઈ અર્થ નહોતો, કારણ કે એમની પાસે કશુંય સાંભળવાનો સમય નહોતો.
આમ એક દુ:ખદ અનુભવ સાથે ઉત્તમભાઈ પાછા આવ્યા. ફરી એમણે સર્જનને મળવાનો પ્રયાસ કર્યો. માંડ મુલાકાતનો સમય મળ્યો, પણ ત્યારે સર્જનને બદલે એમના મદદનીશ મળ્યા. આ મદદનીશને પહેલાં તો લિમ્ફનોડ જ જડતી નહોતી. એણે પાંચ મિનિટ માટે સર્જનને આવી જવા કહ્યું અને આખરે બાયોપ્સી થઈ.
પાંચમી ફેબ્રુઆરીએ બાયોપ્સી કર્યાને બે દિવસ થઈ ગયા, છતાં ઉત્તમભાઈને થોડો દુખાવો રહેતો હતો. તેઓ ઓર્થોપેડિક સર્જન ડૉ. ભણશાળીને મળવા ગયા અને પછી ડૉ. અડવાણીને મળ્યા. બીજી બાજુ લોસ એન્જલસ ડૉ. મણિભાઈ મહેતાને ફોન કરીને જાણ કરી કે ચૌદ વર્ષ પહેલાં થયેલો લિમ્ફનોડનો પ્રશ્ન ફરી ઊખળ્યો છે તે અંગે શું કરવું તે મુંબઈના ડૉક્ટરોની સલાહ મળ્યા પછી જણાવશે.
સાંજના સાત વાગ્યે ઉત્તમભાઈ ડૉ. સુનિલ પારેખને મળ્યા. એમની પાસેથી અમેરિકામાં ડૉ. રૉબર્ટ લ્યુકસના સ્થાને કામ કરતા ડૉ. નથવાણીનો ફોન નંબર લીધો. અમેરિકાના અગ્રગણ્ય હેમેટો-પંથોલોજિસ્ટ તરીકે ડૉ. નથવાણી નામના ધરાવતા હતા. ઉત્તમભાઈએ એમને મુંબઈથી ફોન કર્યો. ડૉ. નથવાણી એમને
138
| SR No. | 032342 |
| Book Title | Aafatoni Aandhi Vachhe Samruddhinu Shikhar U N Mehtanu Jivan Charitra |
| Original Sutra Author | N/A |
| Author | Kumarpal Desai |
| Publisher | Torrent Limited |
| Publication Year | |
| Total Pages | 242 |
| Language | Gujarati |
| Classification | Book_Gujarati |
| File Size | 10 MB |