________________
भविसयत्तकहाए तहि थाइवि जलजंतई कियाइं परिहरिवि वसहमहिसयसयाई । जलजंताकम्मतरु करेवि करणइ पियवयणहिं संवरेवि ।
वहणहिं आरूढ महापहाण वणिवरहं सयई पंचहिं समाण । घत्ता । णिज्जावयवयणुज्जुअमुहई किंखवयई णं णं भडई।
संचल्लइ रयणायरहो जलि खरपवणाहयधयवडइं ॥ २२॥ . दिढ बंधई जिह मल्लरगणाइ णिल्लोहई जिह मुणिवरमणाइ । णिन्भिण्णइं जिह सज्जणहियाई अकियत्थई जिह दुजणकियाई । वहणइं वहंति जलहररउद्दि दुत्तरि अत्याहि महासमुद्दि । लंघतई दीवंतरथलाइ पिक्खंति विविहकोऊहलाई । इय लीलई वचंताहं ताहं उच्छाहसत्तिविकमपराहं । दुप्पवणे घणतरुवरसमीवे वहणइं लग्गइं मयणायदीवे । कल्लोलवोलजलरववमाले असगाहगाहगहणंतराले।
तीरंतरे जं संघट्ट पोय उत्तरिय तरिवपमुहाइ लोय । घत्ता । सो दिट्ट तेहिं मयणायगिरि णयणालोयसुहावणउं ।
दुल्लंघु दुसंचरु दुग्गमु नं पियारु महिलहंतणउं ॥ २३ ॥ तहिं घणतरुसमीवि मयणायदीवि हिंडंति ते वणिंद । दुरुज्झियपमाय परिमुक्कचायचक्कलियगीढविंद । किवि जलु आहरंति कुंभई भरंति आवंति तं जि लेवि । फलतरु चुणंति सव्वइ मुणंति कुसुमई खुडेवि । किवि मिल्लिवि बंधुयत्तु सो भविसयत्तु पइसरइ तं अरन्नु । तरलतमालतालीमालूरमालसालईदुमरवन्नु । पिक्खइ कहिंमि ताई पंकयसराई सयवत्तसोहियाई । कत्थइ पाणियाई अवमाणियाइं करिजूहडोहियाई। कत्थइ णिज्झराई पडिरवकराइ जलरेणुभूसियाई । वरतणुकुसुमगंधपरिमलसुयंधमयरंदमीसियाई । कत्थई मणहराई किसलयहराई दलबहलपत्तलाई । कत्थई मुहरसाइं चिंतियवसाई करगिज्झवरफलाई । कुसुमइ उच्चिणंतु मेइणि मिणंतु संचरई एम जाम । ता वोहित्थबाल निजियखयाल संमिलिय सयल ताम । जंपइ बंधुयत्तु कंटइयगत्तु किं सयल इत्थु आय ।
