________________
बावीसमो सन्धी। जो निंद करंतउ सयणसालि वरतरुणीसहुँ सिहिणंतरालि।
सो सव्वंगइ परिवाए वाए किम सुत्तु निरंतर भूमिभाए । घत्ता । घरि रयणिहिं जाउ पुत्ति चलंति तसंतियउ।
ताउवि तहिं काले धीरवीरसाहस थियउ ॥१॥ परिगलिय रयणि पसरिउ पहाउ पुणरवि रविनंदे खणहं आउ । एवहिं केहउ मुहराउ तासु तवचरणि पवन्नि महानरासु। किं जेहउ पाणिग्गहणि दीवि किं जेहउ गयउरि पहुसमीवि। किं जेहउ मणवेयहो विमाणि कंतादोहलए सुपुज्जमाणि । किं जेहउ पहय अणंतवाले आणिय बंधेविणु पुहविपाले। किं जेहउ परियाणोच्छवेहिं अवरेहिंमि विविहमहोच्छवेहिं । जइ एहउ मुहूं एवहिंमि तासु तो करइ मोहतमतिमिरनासु ।
अरुणुग्गमि विहरिउ सवणतंतु विणियत्तु लोउ धाइउ मुअंतु । घत्ता । गय गयउरि गंपि मिलिय सयलसयणहं सयण ।
नीसासु मुअंति सुमरिवि जम्मंतरहो गुण ॥२॥ रोवइ सुमित्त वल्लहसरूवि मई मिल्लिवि गय भविसाणुरूवि । हा चंचल पहु ववगयसणेह कहु मिल्लिय हउ कंटइयदेह । हा पंकयसिरि धम्माणुराइ पइंसहु दंसणु एत्तिउ सुमाइ। धणवइ विणु पत्तिए तं जि गेहु पिक्खइ पजलंतु दहंतु देहु । निंदइ अप्पाणउ काउं दीणु तर करिवि न सक्कमि हउं निहीणु । धन्नाई ताई तिन्निमि जणाई छड्डेवि लग्गइं तवचरणि जाई। हरियत्तु विसूरइ रुवइ लच्छि हा कमलि कमलि कुवलयदलच्छि । हा भविसयत्त तं करमि तेम एवहिं छड्डिवि पव्वइड केम। पियसुंदरि भूवालिं समाणु रुणुरुणइं झुणई निंदइ नियाणु । सुप्पहधरणीधरपमुह कुम्वर न धरंति अंसु न नियंति अवर ।
ता रोवह तार सुतारियाउ नियवग्गहो नं ओसारियाउ । घत्ता । पियवयणसएहिं पइसिवि मंतिमहंतएहिं ।
दिटुंतहं देवि संबोहिय मइवंतएहिं ॥ ३ ॥ पंकयसिरि भविसउ सियवंतउ तेण समाणु जाउ निक्खंतउ । पुरुसायारुपरकमसत्तिउ घोरधीरु तवचरणु चरंतिउ । सुविणयगुणपारंपरबुद्धिए दंसणनाणचरित्तविमुद्धिए ।
