________________
एकवीसमो सन्धी।
१४१ किवि धरणिंदि किवि सुप्पहेण किवि कणएं किवि सोमप्पहेण। . किवि केणवि नउ सक्किय धरेवि अमुणियणिओय निग्गय वलेवि ।
पारणउं कराविवि एम साहु पुणु अप्पुणु भुंजइ तिलयनाहु । घत्ता । सुहिसयणसमाणु भोयणु करिवि समालहिवि।
पुणु अम्माएवि पणविय पियसुमहरु चविवि ॥३॥ महएविउ बेवि करेवि पासि विनत्त जणणि एकंतवासि । तुम्हइंमि सुणिउं तं कहमि तेम अरिउरि अइरावइ वसिउ जेम कोसिएण वहेवि कसाउ सुट्ठ पाविउ असुरत्तणु जणि अणि? । धजोयरु मंति महाणुभाउ विद्दाविउ किम वच्छलसहाउ । हुअ कित्तिसेण सुप्पहहु माय गुणमाल मरेवि सुमित्त जाय । तुहुं अन्नभवंतरि धणयलच्छि अरिउरि तायहो सा पारियच्छि । महु सुमरिवि तं विज्जुलहो मरणु जो सका तहो पावज्ज सरणु । पंकयसिरि जंपइ निरु पहाणु जं तउ तुहुं तं अम्हहं पवाणु । अणुहूअभोय चिंतियपयास माणेवि थडसंपयविलास । निव्वाहिय सई सच्छंदलील विलसिय विचित्त उज्जाणकील।
मंडलियहं बहुमंडलसयाइं तूसिवि दिन्नइं रूसिवि हयाई । घत्ता । अहिसिंचिवि पट्टि सुप्पाहु करइ नराहिवइ ।
भुंजउ चिरयाल पुत्त रज्जु भविसाणुमइ॥४॥ तं सुणिवि भणइं भविसाणुरूअ तुहं जाम ताम हउं सारभूअ । तुम्हहिं जंतहिं जइ खणुवि थामि तो माए मझु जिणवरु न सामि । मई तुम्ह पसाएं आसमुद्द महि भुंजिवि लाइय कडयमुद्द । पुरगामदेस महराउ देइ महु मुद्दई विणु कोइवि न लेइ।। जसु अभयवयणु मई किउ पसत्थु तहो कोवि न भउ करणहं समत्थु । अवगन्नइं जो महुतणिय आण निंदति तासु जे रणि पहाण । एवहिं सम्माणिवि गुणनिउत्तु जं करइ सामि तं महुमि जुत्तु । जं पुणु थक्कमि पवसंति राए तं थुत्थुक्कारिउ वयणु माए। अहिसेयपटु संपय विचित्त पहुपुत्त रज्जु भुजउ सुमित्त । तो वुच्चइ भूवालहो सुआई मालइमालाकोमलभुआई। गुणमाल हउंमि अरिनयरि आसि बे भव निवसिय तुम्हहंमि पासि ।
