________________
१३८
भविसयत्तकहाए सुवपंचमिविहि करिवि सुवासिय सत्तसहि वासर उववासिय ।
पुणु पंचविहु अणेयपयारिहिं किउ उजवणु विहवअणुसारिहिं । घत्ता । तो मंतिसुआई अणुमोइउ तिविहंतरिण।।
हुआ तउ महएवि तेण फलेण महंतरिण ॥ ११ ॥ जेम ताए तिम पइंमि विहाविउ अणुमोयणफलेण इउ पाविउ । धणयलच्छि धणयत्तु सउन्नउं बहुकालिं पंचत्तु पवनउं । बिनिवि हथिणायपुरि जायइं मिहुणइं परिवडियअणुरायई। सोवि ताहं नंदणु अवसप्पिउ गोडंगणि विज्जुलई झडप्पिउ । संचुण्णिय करोडि सहुं गतिं विहलंघलि हूई घुम्मंतिं । घोरंधारु जाउ चउपासिं हियवइ धुक्कु धुअंतिं सासिं । सुमरिउ ताणं परमजिणाणं घोसिउ नमु नमु अरहंताणं । ता वेलइं तं संबलु लेप्पिणु निग्गउ जीउ सरीरु मुएप्पिणु ।
ताहंमि तणउं पुणुवि संजायउ सो धणमित्तु मरिवि तुहं जायउ । घत्ता । जो जम्मन्भासु आसि पडंतुटुंतहो वि।।
सिरि वज्ज हएवि नउ वीसरइ मरंतहो वि ॥१२॥ जा तहो धणमित्तहोतणिय पत्ति गुणमाल नाम तडितेयकंति। जा सयलवि जुवईयणि वरिट्ट वज्जोयरधीयहो मणहो इट। सा मिलिवि असेसहिं सज्जणेहिं छड्डाविय जलु दुम्मणमणेहिं । विलवंति पराइय कित्तिसेण उटुंति पडंति लहंति चेण । आवीलिउ गुणमालयसमाणु हा काई एउ खलविहिविहाणु । हा पइं विहि हउं विनडिय निरुत्तु हा सुहय तुज्झु किं एउ जुत्तु । हा सुंदर पाविट्ठइं चलाई कहिं पाविओसि विज्जुलखलाए। कंदतिहिं दारुणु कलुण सद्दु उहिउ हाहारउ अइरउहु । पिक्खहु सो कहिं पभणंतियाउ सरवरहो तीरि बिन्निवि गयाउ । धोवंतिए कुंकुमकजलाई दिन्नई नाहहो तिन्निमि जलाई। भग्गई वलयई अवलक्षणाई मुक्कई केऊरई कंकणाई।
अवहरिवि सयलु उवभोयभोउ संचारिउ विहवत्तणविहोउ । घत्ता । करणियई करेवि सुहिसयणइं जिणहरि गयइं।
अवलोइवि जम्मु गुणमालई लइयई वयइं ॥१३॥ कित्तिसेण तउतणई विओएं मुअ सोसिवि अप्पाणउं सोएं।
