________________
११२
भविसयत्तकहाए लइ आरुहहि विमाणि रवन्नई पवणुड्डुअपडायसंच्छन्नई। तिलयदीवि चंदप्पहनाहहो करहु न्हवणु चंदप्पहनाहहो । पुजिवि वम्महवारणुकेसरि पिक्खिउ कुरुजंगलपरमेसरि । सरहसु तं पडिवन्नु नरिंदि लइउ समउ सहुं सजणविदि । तं संकेयतूरु अप्फालिउ दसदिसि वहकयंव ओरालिउ । तहो सहि सुहिसयण पराइय सहुं लच्छिए पंकयसिरि आइय । हरिबल पत्त समउ परिवारिं धणवइ पउरपमुहपब्भारें।
भूवालु वि जुअराय पियच्छिए पियसुंदरिए समउ जयलच्छिए। घत्ता । सम्माणिवि सिहि पुरयणमणई बहुचरिउ ।
परितुट्ठ भणेवि तेहिंवि एवंकार किउ ॥ १४ ॥ तओ ताडिया किंकरहिं सखेरी नरिंदस्स बारे महाणंदभेरी । गया कनकन्नंतरेहिं नराणं समाएसणे पेसणे तं घराणं। हुआ तेण सोऊण बुद्धा समिद्धा महाणंदिया उच्चरोमंचविडा । अहो राउले कोवि आओ अउव्वो नरो वा सुरो वा परो वा सगव्यो। बलं दावए तस्स राओं सराओ जयाणंदभेरीरओ तेण जाओ। गया सीहबारे इमं जंपमाणा न लंघति रायाहिरायस्स आणा। समोहा सरोहा सजोहा पयंडा कयासारिसिज्जा गया लीलगंडा । चलंता वलंता पहंते थुणंता तुरंगा खुरग्गेहिं खोणी खणंता ।
जणो रायमग्गे पसिद्धं पएसा पसाहेइ सव्वायरेणं सुवेसा। घत्ता । पुरि आवणसोह दरिसिय नयणाणंदिरहिं ।
उल्लोचसयाई रइयई जिणवरमंदिरहिं ॥ १५ ॥ तो नरिंदु आरुद्ध महागइ सई सुरनाहु नाइ अइरावइ । पासिहिं बिहिंमि बेवि सुहसेविउ तिलउन्भमसुमित्तमहएविउ । अन्नेत्तहिं भूवालु नरेसरु जो कुरुजंगलद्धि परमेसरु । ढिदीहरपलंबभुवपंजरु पियसुंदरिमुहपंकयमहुयरु । अन्नित्तहिं जुअराउ ससाहणु भूवालहो नंदणु गयवाहणु । पंकयसिरिवि समउ परिवारिं हुअ जंपाणि अहियसिंगारिं। हरियत्तु वि सबंधु सपरिग्गहु चल्लिउ सज्जि निययसुपरिग्गहु । उहयकुलेहिंमि जे सुहिसज्जण ताहिंमि करिवि हियय सव्वग्गण । जिणमंदिरहिं असेसहं जाएवि जिणहरि पुज्जमहिम निज्झाइवि।
