________________
१०४
भविसयत्तकहाए
नियनियघर सिहरहं चडिउ लोउ जंपइ अणि संपयविहोउ । लइ नहु कज्जु अत्थमिउ राउ बलु भज्जइ नीसाहारु साउ । परबलु गहगहइ महोच्छवेण दीसह न किंपि धूलीरवेण । धणवइ परिचितिवि अप्पसाउ सन्नड सुहडसाहणसहाउ । परिरक्खणु किउ पुरवरि सकोसि परियणि अंतेउरि पिंडवासि । इत्थंतरि पइसिवि वरिहिं सिहु अम्हेहिं सयलु संगामु दिनु । विहडिउ सयत्थु उप्पन्नु भंगु वइरिहु बलु मोडिउ चाउरंगु । परथक्कउ परिवद्वियपयाउ तर नंदणु भूवालिं सहाउ ।
सन्नद्धु करिवि करिसारिसज्जु नउ जाणहं होसइ केम अज्जु । धत्ता । एत्तहिवि णरिंदिं वइरिमइंदि अवलोइवि नियबलु नविउ । विहुणियभुंडि रणभरचंडि अप्पुणु सई सन्नाहु किउ ॥ १६ ॥ दुवई । सन्नज्झति तिलयदीवाहिवि समरि सुमित्तताइणं ।
घल्लिवि कवउ लइ कुंताउहु पहुभूवालराइणं ॥
पण विष्पिणु पंकयसिरिसुएण नरनाहु वुत्तु हरिसियभुएण । तुहुं ताय ताम पिक्खंतु होहि दिदु पवणु हउंमि परबलजलोहि । जो अग्गिमखंधि अनंतवाल तहो करमि अज्जु रणि पलयकालु । अन्नुमि चित्तंगहो दलमि दप्पु चिरु पइसिवि मग्गिउ जेण कप्पु । अन्नहंमि असन्नहं करिवि सन्न मोडिवि महिवइ उक्खिणमि कन्न । पंतु एम चलि नरिंदु आरोहिं कन्नारिउ गइंदु | तिं सहुं संचलिय भडमइंद पंचालमिच्छकच्छवनरिंद | पहुमइहरिवाहणलोहजंघ अन्नवि नरवइ जे रणि अलंघ । धत्ता । नरवरेहिं परजिवि गुण निम्मजिवि धणुहरसर संघाणु कि । अक्खयतोणीरिं रणि सुंडीरिं परबलु सरहिं कडन्तरिउ || १७ | दुबई । नियबलु निएवि सरहिं भिड़ंत रणसंगरि पयत्तहो ।
वरदुग्घोट्टि चडिवि उडायउ महिवह भविसयत्तहो ॥ जुअराएं तजिउ सिट्ठिपुत्तु अहो तुम्ह गोत्ति एउवि अजुत्तु । पहु रंजिवि जं परिणिय सुमित्त अवसाणु तासु इत्तडउ मित्त । विहसंतु पपई तिलयराउ हउं फेडमि तुडु सुमित्तवाउ । तं वयणु सुणेवि विरुद्धएण पेसिय सरधोरणि कुडएन । ते लीलई धणवसुण छिन्न अन्नेक्कसरहिं पयरक्ख भिन्न ।
