________________
भविसयत्तकहाए पहरंतिहिं तहिं किय नर दुखंड रणमहि मिल्लाविय मंडमंड । पासहिं हणंति नउ मुहि भिडंति नियडेवि नट्ट दूरे विन जंति । पइसरइ सरइ परबलु अणंतु पहु करहि किंपि संवरहि मंतु । तं सुणिवि पडिय पडिवक्ख खेरि किय सन्नसमाहय समरभेरि।
नियनियआवासहो गय नरिंद कड्रिय तुरंग सन्जिय गइंद। घत्ता । रणरसपक्खत्तिं धणवइपुत्तिं पडिगाहिवि सिय गयउरहो ।
अत्थाणु विसजिवि भडसय तजिवि दिन्नु खंधु रणभरधुरहो ॥ ७ ॥ दुवई । गुडिय महागइंद पक्खरिय तुरंगमजुत्त रहवरा ।
भड सन्नद्ध बद्धढिपरियर दूरुक्खित्तरणभरा ॥ तओ तम्मि काले भडछडवमाले महाजोहकूरे दुहकंततरे । बले अप्पमाणे सुसन्नज्झमाणे रणे नीसरंते भयं वीसरंते। महावाणिवग्गे पुरे हट्टमग्गे समाहुत्तकोवा पयंपंति लोया। अहो दप्पयंतो पमाणं चडतो पसायं चवंतो वियप्पंतचित्तो। इमे अंतराले रणाहुत्तकाले नरिंदस्स बारे भिसं दुप्पयारे । पढुक्को गइंदो मिलंतालिविंदो तओ भविसयतो महारिद्धि पत्तो। अमोहो पसत्थो गइंदासणत्यो अदप्पो अमाया जसामेइ ताया।
रणे उच्छहंता समासेइ संता।। घत्ता । सन्जियजयमंगले घोसियमंगले पिक्खिवि पुत्तहोतणिय सिय।
धणवइहरियत्तहिं पहसियवत्तहिं छड्डिय वणि वावार किय ॥ ८ ॥ दुवई । तो सुमहत्तराण कर मउलिवि नरवइ मुहं नियच्छए ।
परियणि पिंडवासि अंतेउरि तुम्हई थाहु पच्छए॥ चर पेसिवि सुविहियसंपहारु रणि जाणिवि समविसमाणुसारु । तकालसरूविं धरिवि मंतु पुरि पउरि करिव्वउ सुप्पयत्तु । पडिवन्जिय तंपि महानरेहिं मंगलपसत्थ जंपिय सरेहिं । पुणु जणणिसमुहुं सुपइव्वयाउ अहिणंदिवि दिट्ठउ वरतियाउ । तेहिंमि जंपियई सुहासियाई निम्मच्छणाई विविहइं कियाइं । कमलई नवकमलदलक्खणाइं जिणसेसकुसुम करि धरिवि ताई।
अवलोइवि सालंकारु पुत्तु नवकुंदकुसुमदसणाई वुन्तु । घत्ता । चिरु महुं पुच्छतेहिं विणउ वहंतिहिं जं आएसिउ मुणिवरिण ।
तं चडउ पमाणहो निव्वुइठाणहो जिणसासणदेविहु बलेण ॥ ९ ॥
