________________
तेरहमी सन्धी तं निमुणिवि परिओसिउ नरिंदु अवलोइउ नियसामंतविंदु। परिचिंतइ नउ सावन्नु एहु अवयरिउ वीरु पच्छन्नदेहु ।
सचउ रणभरधुरधरणखंधु लइ किजइ आयहो पबंधु । घत्ता । पडिवायपमाणिं सहुं सम्माणिं लड्डु थाउं नियभुयबलहो।
अतुलियमाहप्पि जयजसदप्पें एहु सामि कुरुजंगलहो ॥९॥ दुवई । सारासारसयलपरिवारहो आएं भेउ भिन्नओ।
जाम न लेइ मंड उद्दालिवि ताव रमई जि दिन्नओ। चिंतंतहो नरनाहहो अणंतु मुहुं निएवि वयणु जंपइ फुरंतु । अहो भविसयत्त तउ भडकडप्पु सामियसम्माणिं कहु न दप्पु । को जाणई कजहं गइ विचित्त इय वयणहिं होजहिं सुदिव मित्त । अहो सामंतहो पडिभडवमाले गयउरि कुरुजंगलि सामिसाले। रक्खेजहु होविणु साहिमाण महु पुणु महिवालहोतणिय आण । फेडेव्वउ मई दुव्वयणसल्लु तहो साहणि हर्ड मुहलोहमल्लु । नीसरिउ एम जंपिवि सरोसु सन्नहिवि सुहडसाहणु असेसु ।
चित्तंगहो साहणि गउ तुरंतु किं अच्छहो संचल्लहो भणंतु । घत्ता । संचालहु साहणु हयगयवाहणु रह संजोत्तिवि करहु चल ।
थडि मिलिवि नरिंदहो ससुहडविंदहो भिडहु होइ संजायबल ॥१०॥ दुवई । विहडिउ संधिकज्जु नरनाहहो गउ संगामि निच्छओ।
वयणुवि नउ सहति दप्पुब्भड कोविपडिच्छिओ॥ नरवइवलंहु धणवइहिं पुत्तु देविणु सुमित्त रणभरि निउत्तु । तिसडं जपंतहं चडिउ रोसु हउं मिलिउ तुम्ह संवरिवि कोसु । चित्तंगिं सो पव्वयनरिंदु पिउ जंपिवि सम्माणि सविंदु । पभणिउं तुहं एत्थवि थाहि ताम हउं मिलिवि नरिंदहो एमि जाम । इउ भणिवि पुणुवि गयउरि पइटु दीवियउज्जोएं नरिहिं दिछ । जाणाविउ थाइवि रायबारि तेहिंमि पइसारिउ संपहारि । तेणवि अवलोइउ भविसयत्तु सो पमुहं करिवि नरनाहु वुत्तु । अक्खेव्वउ काई नराहिवासु तहो पोयणपुरपरमेसरासु।। पहु चवह गंपि कहि एम तासु जइ सच्चउ तुहुं बहुमइवियासु। भणु तुम्हहं अम्हहं कवणु रोसु नउ देहं न मग्गहं कप्पु कोसु । पइं मग्गिय जा महुतणिय कन्न सा मइं धणवइनंदणहो दिन्न ।
