________________
भविसयत्तकहाए
नियमंडलु मेल्लिवि अन्नई मिल्लिवि वसविहेय करि सयलमहि ॥३॥ दुवई । नरकरितुरयजोहपाइक्कभयंकरकुरुवकालहो।
पलयजलोहु जेम उच्छल्लिउ नंदणु पिहिमिपालहो ॥ सो नावइ अरिवारणमइंदु पंचालदेसि वइ सविंदु । - खंधारु मिलइ आवासिवासि हउँ पुणु परिपेसिउ तुम्ह पासि । अनुवि संदिहु नराहिवेण नरवइपोयणपरमेसरेण । सुहपत्ति कावि दीहरभुएण आणिय दीवहो धणवइसुएण। महएविहि सा हियवइ पइट्ट पट्टवि मग्गेविणु गुणवरिह। अण्णुवि सुमित्त गुणसारभूअ महएविहिं पियसुंदरिहिं धूअ । चरपुरिसिं केण वि कहिउ तासु पट्टवि पुज्जिवि नरवइहिं पासु । तं वयणु सुणेविणु पत्थिवेण धणवइहिं समुहूं जोइउ निवेण। भविसत्तहो मुहु पुणु पुणु निएवि विहसिउ सरोसु करि वयणु देवि । चित्तंगु भणिउं लहु ताम जाहु पुरवरबाहिरि आवासि थाहु । अम्हइं चिंतेविण संपहारु जाणेविणु नियपरिवार चारु ।
सम्माणि दाणि अहवइ नियाणि उत्तर देव्वउ तुम्हहं विहाणि । घत्ता । तो गउ चित्तंगउ अवहियसंगउ थिउ सवियप्पु समरभरहो।
पसरिवि वित्थारें सहुं खंधारिं आवासिउ बाहिर पुरहो ॥ ४ ॥ दुवई । धणवइ भविसयत्तु पियसुंदरि पिहुमइ मइपहाणओ।
सहुं अन्नहिंमिं सक्कसामंतहिं थिउ मंतणइं राणओ। नरनाहिं तज्जिय सयलमंति अहो अन्नहो अन्न मइउ होंति । अक्खहु परमत्थे नियहियाई चित्तंगहु उत्तरु देहु कांई। पियसुंदरि वुत्त मणोहिराम अंतरिउ कज्जु कज्जेण ताम । अच्छउ जं तं चिंतिउ विसालु खणमित्ति अण्णु पडिवन्नु कालु। अहो धणवइ तउ सव्वाहियारु नियमइपयासु पायडहि चारु। अहो भविसयत्त तुहुं मई निउत्तु भणु जं इह कालहो करणु जुत्तु । तं वयणु सुणिवि नरवइ अलंघु सिरु धुणिवि पयंपइ लोहजंघु । मंतणउं किजइ किंपि ताम वित्थारिउ चित्तंगउ न जाम । अत्थाणि देव ज तेण वुत्तु तं सुणिवि सहतह निरु अजुत्तु । एवहिं कउ निव्वुइ होइ ताम सो खलु खरि बइसारिउ न जाम ।
१ B पुहमी
