________________
भविसयत्तकहाए परियाणेवि कज्जु करि एवहिं जं जं मणहं रुच्चए। घत्ता । एत्तहिं विअणक्खें दरसविलक्खें वुत्तु पुत्तु धणवइण सइ ।
परिवड्डियखेरिहिं निययजणेरिहिं दिट्ठ पुत्तमज्जाय पइ ॥५॥ दुवई । कुडिलसहावभावपरिवंकुडदुक्कडविसमचित्तयं ।
होति वियक्खणेवि दुल्लक्खइं महिलत्तणचरित्तयं । किर वड्डउ इउ भूवालु इत्थु सामण्णु अन्निं गणण कित्थु । तेणवि सुहिसयणइं आहरेवि अब्भत्थिय करसंपुडु करेवि । अहो तहोवि वयणु किउ अप्पमाणु गय घरु जंपेविणु साहिमाणु । एव्वहिं भणु किजई काइ इत्यु तुहुं बुद्धिविणयविक्कमि पसत्थु। तुहुं कुलसाहारणु जगि पवित्तु हउं रंजमि परतउ तणउं चित्तु । तो सहिवि न सकिय एकनारि कमलहि सहि भविसत्तहो बालहारि । वित्थारिवि लोयणदलविसाल उल्लवइ हसेविणु कणयमाल ।
आयहो आएं किर कवणु कज्जु हउं तउ पडिउत्तरु देमि अज्जु । घत्ता । जो पहु परिवारहो विक्कमसारहो सो किं अवहिए संचरइ ।
परसव्वु इच्छज्जइ जणु पडिवजइ सामि अजुत्तुवि जं करइ ॥६॥ दुवई । जं जसुमणि न ठाइ तं तासु भणंतहं केम रुच्चए।
तहवि हुअ परिवाडि पिक्खेविणु जुत्ताजुत्तु वुच्चए । राउलमंडई पिम्मइं न होंति अणुयत्तवसेण घडंति जंति । निक्कारणि पई परिहरिय देवि सोहग्गु माणु मंडणु हरेवि । थिय इत्तिउ कालु अइट्ठसंगि सुहविरहदुक्खसंदीवियंगि। एवहिं दुत्तरि पडिवन्नकालि आणिय घल्लिय सुहिसयणजालि। उप्पायउ जो अकयावराहु सो ताहि केम वीसरइ दाहु । मजाय ताहि सीलत्तणेण नजइ सुपुत्त गुणकित्तणेण । परि तुझुवि किंपि नउ मुणहिं मूड अच्छहि सख्वरणरणइं छूटु ।
तहिं चरिउ कोवि नउ कहइ तुद्ध अइरेण जाइ दुव्वसणमुद्दु । घत्ता । मग्गेविण सारउ दुक्कलियारउ जं तउ सो वधुयत्तडउ ।
जं वुत्तु सरुवई अविणयहूअहं तं तहेवि मत्थइ पडउ ॥७॥ दुबई । नियघरमम्मभेयपहुलजिउ रंजिउ ताहिं वयणहिं।
१ A दुव्वयणछूट
