________________
सत्तमो सन्धी। दुम्मणु तं पइटु वरमंदिरु नयणाणंदिरु । पियहिं पयल्लयाई परियच्छइ सो न नियच्छइ । सुमरिवि वारवार उम्माइय पंचमु गाइय । दुन्नउ नाहि कोवि संभालइ दिसउ निहालइ। पियविरहानलेण संतत्तउ सो हिंडंतउ । पइसइ चंदकंतिचइतालई सव्वसुहालइं।
चंदप्पहु जिणु सामि नवेप्पिणु भामरि देप्पिणु । घत्ता । तइलोयसिहरपुरगामियहो किय थुइ भुवणत्तयसामियहो।
जय तुहुँ गइ तुहुं मइ तुहुँ सरणु लइ एवहिं देहि समाहिमरणु ॥ ८॥ इत्थंतरि संचरइ महाकह जहिं सा भविसयत्तमणवल्लह । अच्छइ वहणसमूहि वहंती दूसहु पियविओउ विसहंती। पोयंतर वरभवणि रवन्नइ पत्तलपिहुलफलयसंच्छन्नइ । मउअतूलिपलंकु मुएविणु थिय जरपीदुखंडु तलि देप्पिणु । बंधुअत्तु वि करेवि इक्तरु ताहि पढुक्कु फलयभवणंतरु । नियडु निविटु तारतरलच्छिहिं चारणपुरिसु नाई नियलच्छिहिं । भमरु अमउलियकमलदलच्छिहिं नं दारिदकंदु धनलच्छिहिं । बोल्लाविय किं काउ किलेसहि किं न तूलिपल्लंकि बईसहि । किं अच्छहि मउलावियवयणी अंसुपवाहजलोल्लियनयणी। मुडि तुज्झु को परिहउ आणहं जाहि अणंगु अंगि रइ माणइं। गयउरि जाहि समउ सुहिलोएं परियणु परिपालहि सुनिओएं। एउ असेसु कोसु तउकेरउ सुहियणजणआणंदुजणेरउ ।
जिम सो तित्थु आसि पियदंसणु तिम हउं तुज्झ पडिच्छियपेसणु । घत्ता । तं निसुणिवि मणि संघटु किउ विहि काई असंभउ दक्खविउ ।
चिंतिहि वयणु समच्छरिउ सो अंसुपवाहिं अंतरिउ ॥९॥ ताहिं सोवि पडिवयणु धरंतउ नियडकवडचाडुयई करंतउ । अंसु फुसंतु जाम कर पेसइ तक्खणि झत्ति पलित्त महासइ । उट्ठिय संवरंति विहडप्फड दोच्छिउ रे ऊसरु तियलंपड । नउ नंदहि चिरु आएं भाएं गउ खउ सहु अप्पणइं सहाएं। १ B सास णियच्छइ २ B घोसिउ
