________________
पञ्चमो सन्धी। सरलंगुलिसुरेहकोमलकर संझावय व नाई नहतंबिर । रयणाहरणविहूसियकंठिं वेलासिरि व उवहिउवकंठिं । किउ अपमाणु णिउत्तु मुहुल्लउ अहरउ नावइ दाडिमहुल्लउ। उत्तुंगिं तिक्खग्गें नासिं पच्छन्नेण व अमुणियसासें। कन्निहिं कुंडलजुअगंडयलिहिं नयणहिं दीहकसणचलधवलिहिं । भउहाजुअलएण सुविहत्ते भालयलेण अद्धससियत्ते। महुपियपेसलमहुरालाविं सिरु आवंचिय केसकलाविं। सो पिक्खेवि अणोवमरूवें अच्छेरइं विन्भमसंभूवें। बोल्लाविय नायरपरिहासहं मणहरकामुक्कोवणभासइं। हे मालूरपवरपीवरथणि अच्छहिं काई इत्थु वज्जियजणि । कारणु काई नयरु जं सुन्नउं मढविहारदेहुरहिं रवन्न । राणउं कवणु आसि इह राउलि धयतोरणमणिखंभरमाउलि । तं निसुणेवि सलजियवयणी थिय हिट्ठामुहपगलियनयणी।
मइलकवोलकजलामीसिय नियकुलदेवयाई मं भीसिय । घत्ता । वरइत्तु पुत्तियहु तउतणउ मुहकमलु निहालहि करि विणउ ।
लइ जलु पक्वालहि लोयणइं मं चिरु करि दुक्खुकोयणइं॥९॥ तो पंगुरणु करेवि समुट्ठिय संभासणवासणइं परिट्टिय । वयणु वलेवि समुहं अवलोइउ नं मयणावयारु संजोइउ । पहउ कडक्खचक्खुविखेविं नं पढमावयासु अवलेविं । चिंतइ वरकुमारि घरु आयहो पेसणु काई करमि हडं आयहो । भायरपियरमित्तसुहिबंधव होंति पढमदंसणि सुहि बंधव । एयहो पुणु परनरहो विसेसणु काई करमि पढमउं संभासणु । बहुविहु एम वियप्पु वहंती ठिय महि वामइं पइ विलिहंती। पढमदंसणायामविओहिं अच्छइ जाम एम मइमोहिं । तं पिक्खिवि पियसंगमधुत्तिं विहसिउ कमलमहासिरिपुत्तिं ।
जं घरगमणायारु मुणिजइ तं परइत्थु गेहि जाणिजइ । घत्ता । तिं वयणिं ताहि मणु अहिमाणकलंकियउ ।
कुलमग्गायारि दूसणु सहिवि न सक्कियउ ॥ १० ॥ सविणय वलिय कुलंकुसवन्नई करिणिवरोहवियक्खणसन्नई। . १ B संझा इवय २ B सा
