________________
શ્રી પાર્શ્વનાથ પરમાત્માનું સ્તવન
૧૬૧ માત્ર પોતાના આત્માના જે અસંખ્યાતપ્રદેશો છે તેના ગુણધર્મો અને પર્યાયધર્મોમાં જ વ્યાપ્ય વ્યાપકપણે જે મહાત્મા રહ્યા છે શેષ સર્વમાંથી અગ્રાહક અને અભોગી થઈને જે મહાત્મા અસંગી બન્યા છે. આ સર્વ ચારિત્રપર્યાયની એકતા સમજવી.
તથા ધ્વંસી એટલે કે નાશ પામવાવાળા તથા તજજન્યતા એટલે કે ઉત્પત્તિધર્મવાળા જે વિભાવદશાના ભાવો છે તે વિભાવદશાના ભાવોનું કર્તાપણું જે અનાદિકાળથી જીવમાં વર્તે છે તેનો ઉચ્છેદ કરવા માટે અત્યન્ત તીક્ષ્ણતાપણું તે તીક્ષ્ણતા ગુણ જાણવો.
આ પ્રમાણે હે પરમાત્મા! તમે આવી શુદ્ધતા એકતા અને તીક્ષ્ણતા આ ત્રણે ગુણો વડે કરીને નિજસ્વભાવે એટલે પોતાના આત્માના શુદ્ધ ક્ષાયિકભાવના ગુણોમાં જ રમ્યા છો. અર્થાત્ હે પ્રભુ! તમે સર્વથા વિભાવદશાથી વિરમીને આત્મસ્વભાવના રમણી બન્યા છો. આવા ગુણો આપનામાં જ છે તેથી ઘણું જ આશ્ચર્યકારી આપનું જીવન છે. / ૩ /
શુભ અશુભ ભાવ અવિભાસ તહકીકતા, શુભઅશુભ ભાવ તિહાં પ્રભુ ન કીધુ II શુદ્ધ પરિણામતા વીર્યકત થઈ, પરમ અક્રિયતા અમૃત લીધું. | ૪ |
ગાથાર્થ - હે પરમાત્મા ! શુભભાવોનું તથા અશુભભાવોનું યથાર્થ જ્ઞાન પ્રાપ્ત કરીને રાગદ્વેષ રહિતપણે તમે તેના જ્ઞાની જ માત્ર રહ્યા છો. પણ ક્યાંય શુભ અશુભ ભાવ તમે ધારણ કર્યો નથી. તમે તે ભાવમાં લેવાતા નથી. આ જ તમારી શુદ્ધતા છે તથા પોતાના શુદ્ધ પારિણામિકભાવે રહેલા વીર્ય ગુણના કર્તા થઈને ઉત્કૃષ્ટ એવું અક્રિયપણું જે છે તે રૂપી અમૃત તમે પ્રાપ્ત કર્યું છે. સારાંશ કે તમે હવે સર્વકાળ શુભાશુભ ભાવોનું અક્રિયપણું પ્રાપ્ત કર્યું છે. / ૪ /
