________________
શ્રી અરનાથ પરમાત્માનું સ્તવન
વિવેચનઃ- અઢારમા શ્રી અરનાથ પરમાત્મા પોતે પ્રથમ તત્ત્વોની રૂચિવાળા બન્યા. ત્યારબાદ અનુક્રમે તત્ત્વાભિલાષી બનીને તત્ત્વસાધક, તત્ત્વધ્યાની થવા દ્વારા મૂલભૂત આત્મતત્ત્વ પોતે પ્રગટ કર્યું.
આવા પ્રભુની પ્રભુતા, શુદ્ધ જ્ઞાયકતા, શુદ્ધ રમણતા, શુદ્ધાનુભવતા, અપૌગલિકતા, અસંગતા, અયોગિતા, સર્વપ્રદેશોમાં નિરાવરણતા, પ્રગટ થયેલી શુદ્ધ સત્તાની ભોગ્યતા, ઈત્યાદિ પરમાત્મામાં વર્તતા અનેક ગુણોના રંગે જે સાધક આત્માઓ રંગાયા છે. તે સાધક આત્મા સમ્યગ્દષ્ટિ, દેશવિરતિધર, સર્વવિરતિધર બનીને પોતાના આત્માની અંતરંગશક્તિનો વિકાસ કરીને પોતાના ગુણો પ્રાપ્ત કરવા રૂપે આગળ વધ્યા છે.
આવા સાધક મહાત્માઓ મોહરાજાનો સર્વથા વિનાશ કરીને વિષય કષાયોની આગને સંપૂર્ણપણે બુઝવીને દેવોમાં ચંદ્રમા સમાન ઉજ્વલ ગુણોના આનંદને પ્રાપ્ત કરીને, કે જે ગુણોનો આનંદ કેવો છે? તો કહે છે કે ગુણોનો જે આનંદ છે તે અવ્યાબાધ છે. શિવ છે. અચલ છે. અરુજ છે. અવિનાશી છે. તેમનું જે અક્ષય સ્વરૂપ છે તેનો જ ઉપભોગ કરતો કરતો આ આત્મા અખંડિત આનંદના ભોગનો વિલાસી થાય છે.
ભાવિમાં ક્યારેય આ ગુણોનો આનંદ લુટાતો નથી. ઓછો થતો નથી. કર્મોથી અવરાતો નથી. સદાકાળ એકસરખો જ આ આનંદ રહે છે. આ રીતે શ્રી અરનાથ પરમાત્માની ભક્તિ, તે જ અમારા માટે પરમ આધાર છે.
શ્રી અરનાથ પરમાત્માની ભક્તિ કરતાં કરતાં સાધકને કોઈ ભય રહેતો નથી. કોઈ શત્રુરાજા કંઈ કરી શકતા નથી. | | અઢારમા શ્રી અરનાથ પરમાત્માના સ્તવનના અર્થ સમાપ્ત થયા છે !
