________________
ભાવોદ્ગાર
જૈનદર્શન અને જૈન સાહિત્યનાં વાચન-મનનમાં વિશેષ રસ હોવાથી લખવા માટેની પ્રેરણા મળતી રહે છે. ઉપરાંત મુંબઇ પર્યુષણ વ્યાખ્યાનમાળા અને શ્રી મહાવીર જૈન વિદ્યાલય-મુંબઈ દ્વારા યોજાતા જૈન સાહિત્ય સમારોહમાં જવાના કારણે પણ વિશેષ વાચન અને ચિંતનનો અવકાશ મળ્યા કરે છે. ખાસ તો ધર્મના સંસ્કારોનું પરિવહન કરતાં જૈન પરિવારમાં જન્મ, માતૃ-પિતૃપક્ષે રહેલા સાધુસાધ્વી ભગવંતોની પ્રેરણાદાયી વાતો, લગભગ તમામ ગુરુ ભગવંતોના ઉપકારી આશીર્વાદ અને શ્રી રૂપાણી જૈન પાઠશાળાનાં માધ્યમથી ધર્મસંસ્કારના સિંચનના સુભગ સમન્વયથી વિશેષ સિંચન થતું ગયું.
પરિણામે જૈન શાસનને ઉજ્જ્વળ યશ અપાવનાર જગદ્ગુરુ શ્રી હીરવિજયસૂરિ મહારાજના જીવનમાંથી ઉત્તમ અંશોનું ચયન થયું, ચાર કષાયોના અગ્નિ સામે શીતળતા વરસાવતાં ઉદાહરણો મળ્યાં, જૈન સાહિત્યમાંથી પ્રેરણાદાયી શીલવાન ચરિત્રો અને એવા જ નારીરત્નોનાં ચરિત્રોનું પઠન કરવાનું મળ્યું એ જ રીતે સમગ્ર કથાસાહિત્યમાં દીપક સમાન શ્રી શ્રીપાળ-મયણાની કથા પરના યશસ્વી ગ્રંથોથી પુરસ્કૃત થવાયું. મધ્યકાલીન જૈન સાહિત્યનો અભ્યાસ કરવાનું પણ નિમિત્ત મળ્યું. જૈનધર્મના પાયાના સિદ્ધાંતોથી પરિચિત થવા માટે આ રીતે વાચન-મનન અને ચિંતનનું પરિણામ આ વિષયક લેખનમાં પ્રાપ્ત થયું અને તેનું સાહિત્યિક મૂલ્ય પણ સમજાયું.
આ દરમ્યાન ગત વર્ષે શ્રી ભાવનગર જૈન શ્વે. મૂર્તિ. તપા. સંઘના પુણ્યોદયે પ. પૂ. આ. ભગવંત શ્રી હેમચન્દ્રસૂરીશ્વરજી, પ.પૂ. આ. ભગવંત શ્રી પ્રદ્યુમ્નસૂરીશ્વરજી આદિ ગુરુ ભગવંતો ભાવનગરના વિદ્યાનગર વિભાગમાં બિરાજમાન હતા. આ.ભ. શ્રી
