Page Text
________________
મુનિશ્રીનું આહ્વાન સાંભળી શ્રીમાન ચોથમલજી જટિયા સભામાં ઊભા થઈ ગયા. મુનિશ્રીની વાણીનો એમના મનમાં ઊંડો પડઘો પડ્યો. તેઓએ જાહેર કર્યું કે “પશુપતિનાથના મુખ્ય રસ્તા પર, જ્યાં પાંચ રસ્તા ભેગા થાય છે, ત્યાં અમારી દોઢ એકર જમીન છે. તેની કિંમત આઠથી દસ લાખ રૂપિયા છે. એ જમીન જૈન ભવનના નિર્માણ માટે અમે ભેટ આપીએ છીએ. તે ઉપરાંત આ ભવનના નિર્માણ માટે બીજા એકવીસ લાખ રૂપિયા આપું છું.” શ્રી ચોથમલજી જટિયાની ઉત્સાહભરી જાહેરાત સાંભળતાં જ આખી સભામાં આનંદનું મોજું ફરી વળ્યું.
એ વખતે જ શ્રી ઉલ્લાસભાઈ ગોલછા અને શ્રી મોતીલાલજીએ ક્રમસર ત્રણ લાખ અને બે લાખ રૂપિયા જાહેર કર્યા. ઉપરાંત ઉમેશચંદ્ર જૈન તથા બીજા ભાઈઓએ પણ દાન જાહેર કર્યા. અડધા કલાકમાં રૂપિયા એકત્રીસ લાખ એકત્ર થયા તથા “મહાવીર જૈન ભવનનો પાયો નાખવાનું નક્કી થયું. ખરેખર, શ્રી જયંતમુનિનું કાઠમંડુનું ચોમાસું ઘણું જ સફળ થયું. આજે એ જમીન ઉપર મહાવીર જૈન ભવન ઉપરાંત દિગંબર જૈન મંદિર અને શ્વેતાંબર જૈન મંદિરનું નિર્માણ થઈ ચૂક્યું છે. આ મંદિરોની પ્રતિષ્ઠા શ્વેતાંબર મૂર્તિપૂજક આચાર્ય શ્રી પદ્મસાગરજી મ.ના શુભ સાંનિધ્યમાં કરવામાં આવી છે. આજે કાઠમંડુમાં જૈનો નિરાળું અસ્તિત્વ ધરાવે છે. દુઃખ એ વાતનું છે કે હજી સુધી મિથિલામાં, જે અત્યારે જનકપુર કહેવાય છે અને જ્યાં ભગવાન મલ્લિનાથનું જન્મકકલ્યાણક છે, ત્યાં હજુ જૈન મંદિરનું નિર્માણ થઈ શકયું નથી. જૈન માટે હજુ નેપાળમાં તીર્થભૂમિનો ઉદ્ભવ થયો નથી. જૈન સમાજે આ વિષય પર ધ્યાન આપવાની જરૂર છે.
સમગ્ર જૈન સમાજ એક સૂત્રમાં બંધાય તેવી તક ચાતુર્માસ દરમિયાન મળી. મુનિશ્રીની ખ્યાતિ સંભાળી ત્રિભુવન કૉલેજના પ્રિન્સિપાલ મહોદયે શ્રી જયંતમુનિનું જાહેર પ્રવચન ગોઠવ્યું. નેપાળ અને ભારતનો સાંસ્કૃતિક સંબંધ કેટલો ઊંડો છે તે બાબતનું ગહન વિશ્લેષણ સાંભળી સૌ ગદ્ગદ થઈ ગયા. સમગ્ર પ્રવચનનો નેપાળી અનુવાદ ત્યાંના દૈનિક પત્રમાં છાપવામાં આવ્યો હતો. સંસ્કૃત કૉલેજઃ
કાઠમંડુમાં એક સંસ્કૃત કૉલેજ પણ છે, જે ગૌરવનો વિષય છે. તેના પ્રિન્સિપાલે શ્રી જયંતમુનિને સંસ્કૃત કૉલેજમાં પધારવા વિનંતી કરી. લોકોના આગ્રહથી મુનિશ્રીએ વીસ મિનિટ સંસ્કૃતમાં પ્રવચન આપ્યું, બાકીના ઉદ્ગારો હિન્દી ભાષામાં સંભળાવ્યા.
શ્રી જયંતમુનિએ જણાવ્યું કે “સંસ્કૃત એ દેવભાષા છે. એટલું જ નહીં, પરંતુ ભારત તથા નેપાળનો સાંસ્કૃતિક ખજાનો સંસ્કૃત ભાષામાં છુપાયેલો છે. આ ખજાનો માનવજાતિની અણમોલ સંપત્તિ છે.” આ વાક્ય સાંભળતાં તાળીઓના ગડગડાટથી સભા ગુંજી ઊઠી.
તેઓએ આગળ કહ્યું કે, “નેપાળ એ ભારતવર્ષનું મસ્તક છે. અહીંની કંદરાઓમાં ઋષિમુનિઓએ અને જૈન સંતોએ સાધના કર્યા પછી જ્ઞાનની ગંગા દક્ષિણમાં વહાવી છે. અર્થાત્ નેપાળ એ ભારતીય સંસ્કૃતિની ગંગોત્રી છે.”
ચાતુર્માસની ઉપલબ્ધિ 3 443
| SR No. | 023252 |
| Book Title | Sadhutanu Shikhar Ane Manavtani Mahek |
| Original Sutra Author | N/A |
| Author | Harshad Doshi |
| Publisher | Jain Academy |
| Publication Year | 2006 |
| Total Pages | 532 |
| Language | Gujarati |
| Classification | Book_Gujarati |
| File Size | 16 MB |