Page Text
________________
અડદની દાળ અને બાજરાના રોટલા આપવામાં આવતા. છાશ દરરોજ મળતી. આમ ભોજન સાદું હતું. એકંદરે જૈન બોર્ડિંગના વિદ્યાર્થીઓએ અમરેલીમાં સારી છાપ પાડી હતી.
વ્યાયામ અને ભોજન એ બંને શરીરના ખોરાક છે. બી. એલ. મહેતાને વ્યાયામનો શોખ હોવાથી બધા વિદ્યાર્થીઓ વ્યાયામમાં મસ્ત હતા. એક અખાડામાં કુસ્તી શીખવવામાં આવતી હતી. વિદ્યાર્થીઓને આટલા કુશળ અને મજબૂત બનાવવામાં ગૃહપતિ શ્રી બી. એલ. મહેતાનો મુખ્ય ફાળો રહ્યો. ગૃહપતિ મહેતાસાહેબ ગુરુ જેવા હતા. આમ બાલ્યકાળમાં મુનિજીને શ્રી લાભશંકરભાઈ જેવા વિદ્યાગુરુ અને મહેતાસાહેબ જેવા સંસ્કારગુરુ ઉપલબ્ધ થયા. એ બંનેએ જીવનનું ઘણું ભાતું આપ્યું છે.
એ વખતે અમરેલીમાં વાડી-વાવેતરનો ખૂબ સારો પ્રચાર હતો. લીલીછમ વાડીઓ શાકબકાલા અને શેરડીના વાડથી શોભી ઊઠતી હતી. એ સમયે હજી એટલા પંપ-સેટ આવ્યા ન હતા. કૂવા પર કોસ ચાલતા. બે બળદ પચાસ બાલદી પાણી સમાય તેવો કોસ ખેંચતા. કૂવા સુધી બળદ જાય ત્યારે કોસ પાણીમાં ડૂબે અને અવાજ કરે. અવાજ બંધ થાય એટલે ખેડૂતને જાણ થાય કે કોસ ભરાઈ ગઈ છે. ખેડૂત બળદોને ડચકારો કરે અને બળદ ચાલી નીકળે. કોસ ઉપર આવી જાય અને અઢળક પાણી મળે. કોસ ખાલી થાય ત્યારે ચલાવનારને બળદો સાથે પાછા પગે ચાલવું પડતું. દર રવિવારે જયંતીભાઈ પોતાની ટીમ સાથે વાડીઓમાં ખાસ ફરવા જતા. ત્યાં સ્નાનવિધિ પતાવી સૌ મિત્રો સાથે મરચાં-ગાંઠિયા-ગોળનો નાસ્તો કરતા અને નિર્દોષ આનંદ મેળવતા.
એક વખત ચાર વિદ્યાર્થી સાથે જયંતીભાઈ વાડીએ જવા નીકળ્યા. સાથે એક શેર લાંબા ફાફડિયા ગાંઠિયા અને વધારેલાં લીલાં મરચાં લીધાં. નાહી-ધોઈને ગાંઠિયાની મઝા લેવાની પ્રબળ ઇચ્છા મનમાં ચાલતી હતી. જયંતીભાઈના હાથમાં પડીકું હતું. અનુભવનો અભાવ હતો. એક મોટા વડલા નીચેથી પાર થતા હતા ત્યારે ઉપર સમડી ચક્કર મારતી હતી. સમડી લાગ જોઈને ખડાક કરતી ઝાપટી. પળભરમાં પડીકું લઈ પાર થઈ ગઈ. બધા મોટું વકાસીને જોતા રહી ગયા. બધી ઇચ્છાઓ પર પાણી ફરી વળ્યું.
સમડી એક મોટો ઉપદેશ આપી ગઈ. અસાવધાન રહેવું તે પ્રમાદ દશા છે અને તેનાથી જીવ દુઃખી થાય છે. પડીકું જવામાં સમડી કરતાં અસાવધાની વધારે કારણભૂત હતી. એટલા માટે જૈન શાસ્ત્રકારો કહે છે કે પ્રતિપક્ષના દોષ કરતાં આધ્યાત્મિક દોષો વધારે કારણભૂત હોય છે. આમ ગાંઠિયા ગયા પણ ઉપદેશ મળ્યો. બાકીના સાગરીતોએ ઠપકો આપ્યો જે મૂંગે મોઢે સાંભળવો પડ્યો.
આ રીતે બાલ્યજીવનની નાનીમોટી ઘટનાઓ અને પ્રસંગો જીવનનાં ઉપદેશાત્મક સંસ્મરણો બની જાય છે.
સાધુતાનું શિખર અને માનવતાની મહેંક n 28
| SR No. | 023252 |
| Book Title | Sadhutanu Shikhar Ane Manavtani Mahek |
| Original Sutra Author | N/A |
| Author | Harshad Doshi |
| Publisher | Jain Academy |
| Publication Year | 2006 |
| Total Pages | 532 |
| Language | Gujarati |
| Classification | Book_Gujarati |
| File Size | 16 MB |