Sadhutanu Shikhar Ane Manavtani Mahek

SR No.: 023252
Original Sutra Author: N/A
Author: Harshad Doshi
Publisher: Jain Academy
Publication Year: 2006
Total Pages: 532
Language: Gujarati
Classification: Book_Gujarati
File Size: 16 MB

Page 387

દુર્ગાપુર, રાણીગંજ, આસનસોલ, નિયામતપુર, સીતારામપુર, બર્નપુર, જેમારી, બરાકર ઇત્યાદિ ક્ષેત્રોમાં જૈન કુટુંબો વસે છે. આ બધાં ક્ષેત્રોને ધર્મલાભ આપી મુનિરાજો આગળ વધ્યા. ઝરિયા સંઘના ભાઈઓ વિહારમાં સાથે હતા. તેઓએ તમામ ક્ષેત્રોનાં ભાઈ-બહેનોને ઝરિયા ઉદ્ઘાટન પર પધારવા માટે વિનંતી કરી. ૧૯૫૮ની ત્રીજી ફેબ્રુઆરીએ ઝરિયામાં પદાર્પણ થયું. ઝરિયામાં નવો ઉપાશ્રય
ઝરિયામાં નવા ઉપાશ્રયનું નિર્માણ થઈ ચૂક્યું હતું. શ્રી કનકભાઈ સંઘવી, કનૈયાલાલભાઈ મોદી, ગૌતમભાઈ મોદી, ટી. એમ. શાહનો પરિવાર, નાનચંદભાઈ પારેખ, વિરજીભાઈ, મનુભાઈ માટલિયા પરિવાર, મણિભાઈ, વગેરે ભાઈઓએ ઘણો જ પુરુષાર્થ કરી, જૂના ઉપાશ્રયને સ્થાને ફત્તેહપુર મહોલ્લામાં નવા ભવનનું નિર્માણ કર્યું હતું.
ઉદ્ધાટન નિમિત્તે મુનિશ્રીને ઝરિયામાં એક મહિનાની સ્થિરતા હતી. ટાટા સંઘના પ્રમુખ શ્રી નરભેરામભાઈ કામાણીના કરકમલોથી ઉદ્ઘાટન રાખવામાં આવ્યું હતું. વિશેષ અતિથિ તરીકે કલકત્તાથી શ્રી સોહનલાલજી દુગડ પધાર્યા હતા. ઝરિયા અને ધનબાદના ભાઈઓએ સંમિલિત થઈ ઉદ્ઘાટનની બધી તૈયારી કરી હતી. ઉદ્ઘાટનના ઉપલક્ષે તપશ્ચર્યાનું પણ આયોજન કરવામાં આવ્યું હતું. તપશ્ચર્યા કરી, ઉત્સવ મનાવવાની પ્રથા જૈન સંસ્કૃતિને અનુકૂળ છે. સમસ્ત ગુજરાતી સમાજ પણ આ મંગળ પ્રસંગે આમંત્રિત હતો. કોલફિલ્ડના અનેક ગણમાન્ય વ્યક્તિઓ પણ હાજર હતા. કોલફિલ્ડના મહાન ઉદ્યોગપતિ હરચંદમલજી જૈન તથા તેમનાં પત્ની પુષ્પાદેવીએ બધી રીતે ભાગ લઈ મુનિઓના ઘણા આશીર્વાદ મેળવ્યા હતા. તેઓ સંપ્રદાયનો ભેદભાવ ન રાખતાં સમગ્ર સમાજને પોતાનો માનતાં હતાં.
સોહનલાલજી દુગડ ક્રાંતિકારી વિચારના હોવાથી તેમણે ઘોષણા કરી કે તે પોતે સમાજના સૌ બંધુઓની સાથે બેસીને ભોજન લેશે. તેઓએ કહ્યું, “હું વિશેષરૂપે અતિથિ છું, પરંતુ મારા માટે વિશેષરૂપે કશી સગવડતા ન હોવી જોઈએ. બધાં દર્શનાર્થીઓનું સમાનરૂપે સ્વાગત થવું જોઈએ.
જ્યારે આપણી જૂની રૂઢિ પ્રમાણે મોટા માણસોને વધારે માન આપવામાં આવે છે, તેમની સગવડતાઓ પણ સારા પ્રમાણમાં ગોઠવાય છે. આ ઉચિત નથી.”
- શ્રી સોહનલાલજીના ઉમદા વિચારો અને વિશાળ હૃદયની સમાજ ઉપર સારી છાપ પડી. તેઓએ પોતાના ભાષણમાં કહ્યું, “આપણે વ્યક્તિગત મોક્ષમાં જવાની આરાધના કરીએ છીએ. પરંતુ આપણે સામાજિક દૃષ્ટિએ કશું કરતા નથી. તેથી જૈન સમાજ સામાજિક ક્ષેત્રે ઘણો પાછળ રહી ગયો છે. આવા ભવ્ય ઉદ્ઘાટન પછી આ ભવનમાં જનઉપયોગી કાર્યો થવાં જોઈએ. સમાજને આ સ્થાનેથી નિરંતર માનવસેવાના સંદેશ મળવા જોઈએ. જૈનોએ વિશ્વની સાથે ચાલવું હોય તો મનુષ્યમાત્રના કલ્યાણની ભાવના કેળવવી પડશે.”
સાધુતાનું શિખર અને માનવતાની મહેંક 360