Page Text
________________
માંગલિકનો મંગલ દિન :
શ્રી જયંતમુનિજીએ કલકત્તા શ્રીસંઘમાં પ્રથમ પ્રવચન આપતાં જણાવ્યું કે “જૈન સિદ્ધાંત વેરનો ત્યાગ કરી, અહિંસાની ભાવના જાગ્રત કરી, સમસ્ત જીવોના સુખનો વિચાર કરે છે. નાનામાં નાના જીવોને દુ:ખ ન થાય કે કષ્ટ ન થાય તેનો સૂક્ષ્મ વિચાર જૈન શાસ્ત્રોમાં જોવા મળે છે. આપણા જીવનને સફળ બનાવવું હોય તો અહિંસાનું અવલંબન કરી, વિશુદ્ધ પ્રેમસૂત્રનો પ્રકાશ કરી, એકબીજા પ્રત્યે સંપૂર્ણ સન્માન જાળવી, નિષ્ઠાપૂર્વક ભગવાન મહાવીરના તપોમય માર્ગ ઉપર ચાલવા પ્રયાસ કરીએ તો આપણું વ્યવહારિક જીવન પણ સુધરે અને આધ્યાત્મિક જીવન પણ સુધરે.”
પૂ. તપસ્વી મહારાજે પૂર્વભારતના બધા સંઘોની પ્રશંસા કરી. તેઓએ જે ભક્તિની અભિવ્યક્તિ કરી છે તેનો ઉલ્લેખ કરી સૌને દાન-શીલ-તપ-ભાવના માર્ગ ઉપર મંગલ આશીર્વાદ આપ્યા.
શ્રી માણેકચંદ દેસાઈ કે જેમણે વારાણસીથી અત્યાર સુધી અપૂર્વ સેવા બજાવી હતી અને ત્રણ વરસ સુધી મુનિશ્રીના વારાણસીના અધ્યયનનો મોટો ભાર વહન કર્યો હતો, તેઓ તરફથી આજે પ્રથમ પ્રભાવના રાખવામાં આવી હતી. છથી સાત હજાર માણસોની ઉપસ્થિતિ હોવા છતાં અપૂર્વ શાંતિ જળવાઈ રહી હતી. મુનિરાજો પ્રત્યે અહોભાવ વ્યક્ત થઈ રહ્યો હતો. આ બધી ભાવનાઓને અંતરંગમાં સંચિત કરી, શ્રી જયંતમુનિજી મહારાજે નવા ઉપાશ્રયમાં શ્રીસંઘને પ્રથમ માંગલિક સંભળાવ્યું તથા ભગવાન મહાવીરના અને પૂજ્ય તપસ્વી મહારાજના જયનાદો સાથે સભા સમાપ્ત થઈ. ભવાનીપુરમાં અઠ્ઠઈની અખંડ સાંકળઃ
કલકત્તા પ્રવેશ પછી અને ચાતુર્માસ આરંભ થયા પહેલાં મુનિરાજો ભવાનીપુરમાં પધાર્યા. એ સમયે ભવાનીપુરમાં ખૂબ જ ટાંચાં ઘર હતાં. છતાં જે કોઈ પરિવાર ભવાનીપુર વિસ્તારમાં રહેતા હતા તે બધા જ કલકત્તાના જૈન અને ગુજરાતી સમાજનાં અગ્રેસર કુટુંબો હતાં.
પૂજ્ય તપસ્વી મહારાજ અને જયંતમુનિજીએ ચુનીભાઈ હેમાણીના મકાનમાં સ્થિરતા કરી. શ્રીયુત ચુનીભાઈ હેમાણીનાં ધર્મપત્ની પ્રભાબહેન ઘણાં કોઠાડાહ્યાં અને ભાવિક આત્મા હતાં. તે મહેમાનોનું હાર્દિક સ્વાગત કરી સેવા બજાવતાં હતાં. એ જ રીતે ચંચળબહેન હેમાણી બધાં બહેનોની સેવામાં રત રહેતાં. એક રીતે ભવાનીપુરમાં જ કલકત્તાના મંગલ ચાતુર્માસનો શુભારંભ થઈ ગયો હતો. અષાઢ સુદ પૂનમ પહેલાં જ તપસ્યાની લહાણી શરૂ થઈ. એ વખતે વીસ-પચ્ચીસ ભાઈબહેનોએ અઠ્ઠાઈ તપની આરાધના કરી. ત્યારબાદ ભાઈઓ અને બહેનોએ સંકલ્પ કર્યો કે કારતક સુદ પૂનમ સુધી અઠ્ઠાઈની અખંડ સાંકળ ચાલુ રાખવી. ચોમાસામાં એક પણ દિવસ એવો ન હોવો જોઈએ જ્યારે કોઈ અઠ્ઠાઈ ન હોય. ખરેખર ! ભાઈઓએ તથા બહેનોએ આ સંકલ્પ પૂરો કર્યો.
સાધુતાનું શિખર અને માનવતાની મહેંક 7 258
| SR No. | 023252 |
| Book Title | Sadhutanu Shikhar Ane Manavtani Mahek |
| Original Sutra Author | N/A |
| Author | Harshad Doshi |
| Publisher | Jain Academy |
| Publication Year | 2006 |
| Total Pages | 532 |
| Language | Gujarati |
| Classification | Book_Gujarati |
| File Size | 16 MB |