Sadhutanu Shikhar Ane Manavtani Mahek

SR No.: 023252
Original Sutra Author: N/A
Author: Harshad Doshi
Publisher: Jain Academy
Publication Year: 2006
Total Pages: 532
Language: Gujarati
Classification: Book_Gujarati
File Size: 16 MB

Page 13

ભક્તોના યોગદાનની નોંધ પરિશિષ્ટમાં લીધી છે. અનેક પ્રકારની મર્યાદાઓને કારણે તેમાંથી કોઈ નામનો ઉલ્લેખ રહી ગયો હોય તો તે બદલ ક્ષમા ચાહું છું.
જૈન ઍકેડેમી લકત્તાના મારા સાથીમિત્રોએ અનેક જવાબદારીઓ મૂકભાવે બજાવીને ગુરુભક્તિ બતાવી છે અને મને જે પીઠબળ આપ્યું છે તે બદલ તેમનો સ્નેહભીનો આભાર માનું છું.
શ્રી જયંતમુનિજીના જીવનમાં આવતાં ૧૯૬૦ સુધીનાં પ્રેરક પ્રસંગો અને ઘટનાઓને આ પુસ્તકમાં લેવાયાં છે. પુસ્તકના દળની મર્યાદાને, માહિતીના સંકલન-આલેખનમાં લાગતા સમયને અને ગુરુદેવના ભક્તોની આતુરતાને ધ્યાનમાં રાખતાં ૧૯૬૦ પછીની ઘટનાઓને સંક્ષિપ્તમાં આવરી લેવી પડી છે. એ રીતે આ પુસ્તક પૂ. ગુરુદેવના જીવનનો પૂર્વાર્ધ છે, જેમાં મુખ્યત્વે તેમની ઘડતર, ચણતર અને ચિંતનની ભૂમિકા આપવામાં આવી છે. પૂ. તપસ્વીજી મહારાજનો સંથારો, બિહારમાં કારમો દુષ્કાળ અને બેલચંપાના અહિંસા નિકેતનના માધ્યમથી અપૂર્વ સેવા અને પેટરબારનો અભ્યુદય અને આદિવાસીઓ માટેના તેમના કરુણાભીના અને હૃદયસ્પર્શી સેવાયજ્ઞની કથાનો માત્ર સ્પર્શ જ થયો છે. આશા છે કે ગુરુદેવની કૃપાથી ઉત્તરાર્ધનું લેખન સત્વરે હાથમાં લેતા ભક્તજનોની પિપાસા સંતુષ્ટ થશે. તે માટે આગમદિવાકર પૂ. શ્રી જનકમુનિજી, શાસન અરુણોદય પૂ. શ્રી નમ્રમુનિજી અને પૂ. લલિતાબાઈ મ.સ. (બાપજી) તરફથી પ્રેરણા મળી છે. તેમની કૃપાથી ઉત્તરાર્ધનું કામ નિઃસંદેહ પાર પડશે.
શ્રી જયંતમુનિની કથા ફક્ત તેમના જીવનની કથા નથી, કે ફક્ત તેમના સંઘર્ષની કથા નથી. આ કથા એક જૈન સાધુએ પોતાના ત્યાગ અને સમર્પણથી રચેલા નવા ઇતિહાસનું સર્જન છે. આ કથા આપણા સૌની ગૌરવગાથા છે. તેમણે જૈન અને ભારતીય સંસ્કૃતિના પ્રાણને ધબકતા રાખવા પોતાના જીવનને સમર્પિત કર્યું છે.
જ્ઞાન એ દીપકની જ્યોત છે. સેવા અને સમર્પણના દિવેલ વગર શાનનો દીપક પછાત અને ગરીબના અંધકારમય જીવનને ઉજાગર ન કરી શકે. આ તેમનો જીવનમંત્ર છે. તે આપણો પણ જીવનમંત્ર બને અને તેમણે કંડારેલી કેડીએ ચાલીને આપણે તેમની દૂરગામી, પ્રબુદ્ધ, સંવેદનશીલ, કરુણાભીની અને યુગસર્જક જીવનગાથામાંથી પ્રેરણા અને દૃષ્ટિ મેળવીએ તે જ અભ્યર્થના.
- હર્ષદ દોશી
કલકત્તા
ફાગણ પૂર્ણિમા, ૧૪ માર્ચ, ૨૦૦૬
XII