________________
(૨૭૮)
..સીતા-અપહરણ......ભાગ-૩
શકે. લોકોને મુડા જેવા બની ગયા છો એમ કહી શકે, બંગડીઓ પહેરાવાનું પણ કહી શકે, છતાં ધણીએ ચૂડીઓ ભાંગવાનું પણ કહી શકે, છોકરાને માબાપની સામે થઈને પણ રાષ્ટ્રીય ચળવળમાં જોડાવાનું કહી શકે અને ધર્મીઓ ધર્મદ્રોહીઓને માટે ‘ધર્મદ્રોહી’ શબ્દ વાપરે, સંઘત્વહીન સમૂહને માટે શાસ્ત્રમાં કહ્યા મુજબનું ‘હાડકાંનો સમૂહ' આવું વિશેષણ વાપરે, એમાં એવાને વાંધો લાગે, એનું કારણ શું ?
શાસનના દરેક સેવકની જરૂરી અને ઉત્તમ ફરજ
ખરી વાત તો એ છે કે, ત્યાં તેમનું અર્થીપણું છે અને અહીં નથી. આવા વખતે તો એવાઓના ઉન્માદની ઉપેક્ષા કરીને, એવાઓ દિ' ઉગ્યે અને દિ' આથમ્યે જે જે ગાળો ભાંડે, તોફાનો મચાવે, આક્રમણો કરે અને જુઠ્ઠા તથા હલક્ટ આરોપો મૂકે તે સહીને પણ, સાચી સ્થિતિ યોગ્ય હિતકર શબ્દોમાં દરેકે દરેક સુવિહિત સાધુસાધ્વીએ અને શ્રદ્ધાસંપન્ન શ્રાવક-શ્રાવિકાએ જાહેર કરવી જોઈએ. જેથી એવાઓના પાપે ઇતર આત્માઓ ખોટા ખ્યાલમાં ઘેરવાઈ ન જાય. એવા ધર્મનો દ્રોહ કરનારાઓની સાથે આપણને અંગત વૈર નથી. તેમના આત્માનું પણ ભલું થાઓ એ જ આપણી ભાવના છે. પરંતુ શ્રી જૈનશાસનમાં પવિત્ર સત્યોની સામે હુમલો લાવનારાઓથી, શાસનના દરેક સેવકે શાસનનું સંરક્ષણ કરવું એ તેની જરૂરી અને ઉત્તમમાં ઉત્તમ ફરજ છે.
હવે અહીં કુળપ્રધાનો શ્રી બિભીષણને વધુમાં એમ પણ કહે છે કે, ‘વળી સુગ્રીવ અને હનુમાન આદિ રાઘવને મળી ગયા છે.' અને એમ કહ્યા બાદ તરત જ એમ થવાનું કારણ બતાવતાં હોય એમ જણાવે છે કે, “વાત પણ સાચી છે કે, ન્યાયી મહાત્માઓના પક્ષને કોણ અવલંબતું નથી ?” ખરેખર ન્યાયી મહાત્માઓના પક્ષને સૌ કોઈ અવલંબે છે, એમ ભાષામાં કહેવાય, છતાં પણ દુનિયાના બધા જ મનુષ્યો ન્યાયી મહાત્માના પક્ષને અવલંબે જ. એવું એકાંત નથી. જો ન્યાયી મહાત્માના પક્ષને જગતના સઘળા જ મનુષ્યો અનુસરતા જ હોત, તો તો આખુંય વિશ્વ શ્રી જૈન ધર્મનું અનુયાયી બની ગયું હોત. શ્રી જિનેશ્વરદેવ જેવા ન્યાયી મહાત્મા તો બીજા કોઈ નહિ ને ?
