________________
જાપથી મન સ્થિર થાય છે. હૃદય પ્રફુલ્લિત બને છે. વિચારો કેન્દ્રીભૂત બને છે. હૃદયમાંથી પ્રગટતા ઉચ્ચારો ઈષ્ટપ્રભુની નજીક લઈ જાય છે. ભક્તિ પ્રગટે છે. ભાવના પ્રગટે છે. ધ્યાનસ્થ થવાય છે. મન દ્રઢ બને છે. આંદોલનો જાગે છે. ભક્તિ ફલદાયી બને છે. મનની ગતિ પરમાત્મા પ્રતિ આગળ વધે છે. જાપ ભક્તિનું - ધ્યાનનું - આત્મિક વિકાસનું શ્રેષ્ઠ સોપાન છે. જાપ તારે છે. જાપ ભાવ જગાડે છે. જાપ ફળ પમાડે છે. જાપ ધ્યાન લગાવે છે. મહાવીર પ્રભુના નામના જાપ કરવાથી માનવમાત્રની સદ્ગતિ થશે. કલિયુગની વાત ન્યારી છે. કલિયુગમાં આમ બનશે. કલિયુગમાં મહાવીર પ્રભુના નામના જાપ ચમત્કારિક અસર કરશે. પ્રભુના નામના જાપ ભવતારક ઔષધ સમાન બની રહેશે. જાપ પણ યજ્ઞ સમાન છે. જિવા દ્વારા ને છેવટે અંતરના ઊંડાણ દ્વારા થતું પ્રભુના નામનું ઉચ્ચારણ યજ્ઞસ્વરૂપ બની રહે છે.
યજ્ઞ જેમ ફળ આપે છે, તેમ જપરૂપી યજ્ઞ પણ સદ્ગતિ અપાવનાર બની રહેશે.
ભવતારક, જગતોદ્ધારક મહાવીર પ્રભુના નામનું ઉચ્ચારણ જડીબુટ્ટી સમાન બની રહેશે.
પ્રભુના નામનો જાપ યજ્ઞ હશે.
એક એવો યજ્ઞ કે જેની બરાબરી કરનાર બીજો કોઈ યજ્ઞ નહિ હોય.
भवन्ति सर्वजातीया, जैना एव जिना: स्वतः। कलौ जैनस्य पूजैव, जिनपूजाऽस्ति सत्तया ॥ ३१२ ॥ સર્વ જાતિના જૈનો જ સ્વતઃ જિનો થાય છે. કલિયુગમાં જિનપૂજા સત્તાથી ફળ આપનારી છે. જિનપૂજા ઉત્તમ પૂજા છે. કલિયુગમાં જૈનોની પૂજા એજ સત્તાથી જિનપૂજા છે. જૈનપૂજા જ જિનપૂજા છે.
૨૯૯
