________________
पञ्चद्रव्याऽऽत्मकं विश्वं, सर्वं जानाति केवली । अघातिनामकर्माद्यं, भुनक्ति परमार्थकृत् ॥ १०१ ॥
કેવલી પરમ જ્ઞાતા છે.
સ્થળ અને કાળને ભેદીને તેમની જ્ઞાન દ્રષ્ટિ આરપાર જોઈ શકે છે. ન કાળનું બંધન, ન કાળની મર્યાદા.
ન સ્થળનું બંધન, ન સ્થળની મર્યાદા.
સમસ્ત વિશ્વને કેવલી જાણે છે. જ્યાં કેવળ અને કેવળજ્ઞાન જ વિલસી રહે છે તે કેવલજ્ઞાન. આવા કેવલજ્ઞાનના જ્ઞાતા તે કેવલી. કેવલી ભગવંત.
અને કેવલજ્ઞાન ઉત્પન્ન થયા પછી તથા કેવલજ્ઞાનને પ્રાપ્ત થયા પછી બીજા જ્ઞાનની કોઈ જરૂર નથી જ નથી..... !
કેવળજ્ઞાન આગળ જગતનાં અન્ય તમામ જ્ઞાન છીછરાં અને વામણાં લાગે છે.
કેવળજ્ઞાન એ જ્ઞાનની સર્વોચ્ચ ઊંચાઈ છે. કેવલી શાતા દ્રષ્ટા છે.
તમામ અંતરાયોને ભેદતી, તમામે દિવાલોને વિધતી અને તમામ પટલોને પાર કરતી એમની દ્રષ્ટિ કેવળ સત્ય પર સ્થિર થાય છે. વિશ્વના પદાર્થો તેને અવરોધી શકતા નથી.
વિશ્વની વિષમતાઓ તેને રૂંધી શકતી નથી.
અને એટલે જ કેવળજ્ઞાન જ્ઞાનની સર્વ ઊંચાઈઓથી ઉપર અને સર્વ મર્યાદાઓની પેલે પારનું જ્ઞાન છે. આધિભૌતિકથી પર રહેલું ઊંચાઈનું જ્ઞાન છે.
વિશ્વ વિષમ છે. વિષમતાના વેલાઓથી વિંટળાયેલું છે. સંસાર સ્વભાવથી સભર છે.
જગત પાંચ દ્રવ્યોનું બનેલું છે.
અને આ પંચદ્રવ્યાત્મક વિશ્વને જાણવું - સમજવું - ઓળખવું સરળ નથી. અતિ કઠિન કાર્ય છે.
પણ આ પંચ દ્રવ્યાત્મક વિશ્વને જાણે છે માત્ર કેવલી.
પરમાર્થને કરનાર નામકર્મ આદિ અઘાતિ કર્મને ભોગવે છે.
૧૧૫
