________________
१२९. अहिगरणकडस्स भिक्खुणो, वयमाणस्स पसज्झ दारुणं । अट्ठे परिहायती चहू, अहिगरणं न करेज्ज पंडिए ॥१९॥ १३०. सीओदगपडिदुगंछिणो, अपडिण्णस्स लवावसक्किणो । सामाइयमाहु तस्स जं, जो गिहिमत्तेऽसणं न भुंजती ॥ २० ॥
१३१. न य संखयमाहु जीवियं, तह वि य बालजणे पगब्भती । बाले पावेहिं मिज्जती, इति संखाय मुणी ण मज्जती ॥ २१ ॥
१३२. छंदेण पलेतिमा पया, बहुमाया मोहेण पाउडा ।
वियडेण पलेति माहणे, सीउण्हं वयसाऽहियासते ॥ २२ ॥
"
१३३. कुजए अपराजिए जहा अक्खेहिं कुसलेहिं दिव्वयं । कडमेव गहाय णो कलिं, नो तेयं नो चेव दावरं ॥ २३ ॥
१३४. एवं लोगंमि ताइणा, बुइएऽयं धम्मे अणुत्तरे ।
तं हि हितं ति उत्तमं, कडमिव सेसऽवहाय पंडिए ॥ २४ ॥
१३५. उत्तर मणुयाण आहिया, गामधम्मा इति मे अणुस्सुतं । जंसी विरता समुट्ठिता, कासवस्स अणुधम्मचारिणो ॥ २५ ॥ १३६. जे एय चरंति आहियं, नातेणं महता महेसिणा । उत ते समुट्ठिता, अन्नोन्नं सारेंति धम्मओ ॥ २६ ॥
१३७. मा पेह पुरा पणामए, अभिकंखे उवहिं धुणित्तए । जे दूवणतेहि णो णया, ते जाणंति समाहिमाहियं ॥ २७ ॥
34
