________________
३७. एवं तु समणा एगे मिच्छदिट्ठी अणारिया।
असंकिताइं संकंति संकिताइं असंकिणो ॥१०॥
३८. धम्मपण्णवणा जा सा तं तु संकंति मूढगा।
आरंभाइं न संकंति अवियत्ता अकोविया ॥११॥ ३९. सव्वप्पगं विउक्कस्सं सव्वं णूमं विहूणिया ।
अप्पतियं अकम्मंसे एयमटुं मिगे चुए ॥१२॥ ४०. जे एतं णाभिजाणंति मिच्छट्ठिी अणारिया ।
मिगा वा पासबद्धा ते घायमेसंतऽणंतसो ॥१३॥
४१. माहणा समणा एगे सव्वे णाणं सयं वदे ।
सव्वलोगे वि जे पाणा न ते जाणंति किंचणं ॥१४॥ ४२. मिलक्खु अमिलक्खुस्स जहा वुत्ताणुभासती
ण हेउं से विजाणाति भासियं तऽणुभासती ॥१५॥
४३. एवमण्णाणिया नाणं वयंता विसयं सयं ।
णिच्छयत्थं ण जाणंति मिलक्खू व अबोहिए ॥१६॥
४४. अण्णाणियाण वीमंसा अण्णाणे नो नियच्छती ।
अप्पणो य परंणालं कुतो अण्णेऽणुसासिउं? ॥१७॥ ४५. वणे मूढे जधा जंतू मूढणेताणुगामिए ।
दुहओ वि अकोविता तिव्वं सोयं णियच्छति ॥१८॥
४६. अंधो अंधं पहं णितो दूरमद्धाण गच्छती । आवज्जे उप्पधं जंतु अदुवा पंथाणुगामिए ॥१९॥
10
