________________
बिइओ उद्देसओ
२८. आघायं पुण एगेसिं उववन्ना पुढो जिया । वेदयंति सुहं दुक्खं अदुवा लुप्पंति ठाणओ ॥ १ ॥
२९. न तं सयंकडं दुक्खं कओ अन्नकडं च णं । सुहं वा जइ वा दुक्खं सेहियं वा असेहियं ॥२॥
३०. न सयं कडं ण अन्नेहिं वेदयंति पुढो जिया । संगतियं तं तहा तेसिं इहमेगेसिमाहियं ॥ ३ ॥
३१. एवमेताइं जंपता बाला पंडियमाणिणो । णियया ऽणिययं संतं अजाणता अबुद्धिया ॥ ४ ॥
३२. एवमेगे उपासत्था ते भुज्जो विप्पगब्भिया । एवं पुवट्ठिता संता ण ते दुक्खविमोक्खया ॥५॥
३३. जविणो मिगा जहा संता परिताणेण वज्जिता । असंकियाई संकंति संकियाइं असंकिणो ॥ ६ ॥
३४. परिताणियाणि संकंता पासिताणि असंकिणो । अण्णाणभयसंविग्गा संपलिंति तहिं तहिं ॥ ७ ॥
३५. अह तं पवेज्ज वज्झं अहे वज्झस्स वा वए । मुंचेज्ज पयपासाओ तं तु मंदे ण देहती ॥८॥
३६. अहियप्पाऽहियपण्णाणे विसमंतेणुवागते । से बद्धे पयपासेहिं तत्थ घायं नियच्छति ॥९ ॥
8
