________________
પ્રકાશકીય....
વર્તમાન સદીના અજોડ શાસન પ્રભાવક-સંરક્ષક, સુવિશાલગચ્છાધિપતિ અમરયુગપુરુષ પૂજ્યપાદ આચાર્ય દેવેશ શ્રીમદ્ વિજય રામચન્દ્ર સૂરીશ્વરજી મહારાજાના પટ્ટાલંકાર સિદ્ધાંતનિષ્ઠ-નીડર વક્તા પૂજ્યપાદ આચાર્યદેવ શ્રીમદ્ વિજય રવિચન્દ્રસૂરીશ્વરજી મહારાજાના પ્રભાવક પટ્ટાલંકાર પૂજ્યપાદ પંન્યાસપ્રવરશ્રી જયદર્શનવિજયજી ગણિવર્યશ્રીના માર્ગદર્શન મુજબ અમે ‘શ્રી સક્રિસય પયરણ' નામનો આ ગ્રંથ પ્રગટ કરી રહ્યા છીએ.
પૂ. પંન્યાસપ્રવરશ્રી ભુવનભૂષણવિજયજી મ.સા.એ આ ગ્રંથ ફરીથી છપાવવાનું નક્કી કર્યું હતું. તે માટે પૂર્વ પ્રકાશિત સટીક આ ગ્રંથનો ગુજરાતી અનુવાદ તેઓશ્રીએ મુમુક્ષુ મીનાબહેન પાસે કરાવી રાખેલો. પૂર્વ પ્રકાશનના સંશોધક ન્યાયતીર્થ – વ્યાકરણતીર્થ પંડિત શ્રી હરગોવિંદદાસ હતા. તેમણે વારાણસીના શ્રી કુશળચંદ્ર ગણિ બૃહસ્પુસ્તકાલયમાંથી ત્રણ હસ્તપ્રતો પ્રાપ્ત કરી તેના આધારે સંશોધન કર્યું હતું. આ સંશોધિત ગ્રંથ મુનિશ્રી મોહનલાલજી જૈન ગ્રંથમાળા નં. ૨ રૂપે વિ.સં. ૧૯૭૩માં પ્રકાશિત થયો હતો. પૂ. પં.શ્રી ભુવનભૂષણ વિ.મ.એ પૂ.પં.શ્રી જયદર્શન વિ.મ.ને એ બધું પ્રકાશિત કરવા માટે આપતા તેઓશ્રીએ નવેસરથી મૂળ - ટીકા - ભાષાંતરનો ક્રમ ગોઠવી ગ્રંથ તૈયાર કર્યો. અન્ય ઉપયોગી સામગ્રી પણ સંમિલિત કરી. બહુ ઓછા સમયમાં આ ગ્રંથ અમો પ્રગટ કરી શક્યા છીએ તે અમારા માર્ગદર્શક પૂ. પંન્યાસજી ભગવંતનો ઉપકાર છે.
આ ગ્રંથના પરિશીલનથી સૌ કોઈ આત્મા પોતાના સમક્તિને દૃઢ બનાવે અને પરંપરાએ સિદ્ધિ ગતિને વરે તેવી ભાવના.
શ્રી જિનાજ્ઞા પ્રકાશન, અમદાવાદ.
