Page Text
________________
इंदियकसायहणणा, हणिय च्चिय आसवा जओ होइ । अहियाऽऽहारे मुक्के, रोगा इव आउरजणस्स एत्तो च्चिय सव्वेसु वि, जिएसु वटुंति अप्पए व्व मुणी। न य एत्तो वि उवाओ, अण्णो विज्जइ सुगइलाभे ता नाणज्झाणेहि, तवोबलेण य बला निलंभित्ता । सव्वाऽऽसवदाराई, धारेज्जा अविगलं सीलं तह मणसमाहिलक्खण-मऽवि सीलं मोक्खसाहणगुणाणं । जाणाहि मूलकारण-भूयं जम्हा सुए भणियं जस्स धिई तस्स तवो, जस्स तवो तस्स सोग्गइ सुलहा । जे अधिइमंतपुरिसा, तवो वि खलु दुल्लहो तेसिं किंच मणवयणकाया, जे भणिया करणसण्णिया तिण्णि । ते धितिमंतस्स गुणाय, होति दोसाय इयरस्स तम्हा पुरंधिपडिबंध-बंधणं दुहनिबंधणं धुणिउं। सामण्णं पडिवण्णा, धण्णा भवभवणनिविण्णा धण्णा सत्तहियाई, सुणंति धण्णा करेंति निसुयाई। धण्णा सोग्गइमग्गे, रमंति सीले गुणुप्पीले सण्णाणवायसहितो, सीलुज्जलिओ विगिट्ठतवजलणो। संसारमूलबीयं, दहइ दवऽग्गी व तणरासिं निम्मलसीलधराणं, इहलोए चेव तह य परलोए। गउरवमुवेइ अप्पा, परमप्पा एस चेव त्ति अच्चंतमहाघोरा वि, आवया सच्चसंधणपरेहिं । लीलाए नित्थरिज्जइ, सोच्छाहं सीलबलिएहिं सीलसमलंकियाणं, मरणं पि वरं खु तक्खणा चेव। चिरजीवियं पि मा पुण, सीलाऽलंकारचुक्काणं वरमऽरिघरेसु भिक्खा, अभिक्खणं भमडिया सुसीलेणं । चक्कित्तणं पि मा पुण, परिमलियविसालसीलस्स। गरुयगिरितुंगसिंगा, वरंखु विसमे कहिं पि पडिऊण । दढकढिणपत्थरंऽतो, अप्पा सयसिक्करं नीओ परिकुवियफारफुकार-घोररुहिराऽरुणऽच्छिदुप्पेच्छे। वरमऽहिमुहम्मि हत्थो, पक्खित्तो तिक्खदसणम्मि गयणविसप्पणदुप्पेच्छ-पचुरजालाकलावकलियम्मि। वरमऽप्पा पक्खित्तो, खयऽग्गिकुंडे पयंडम्मि मत्तकरिकरडपुडपाडणेक्क-दप्पिट्ठदुट्ठकेसरिणो । वरमाऽऽणणे पवेसो, सुतिक्खदढदाढकढिणम्मि मा पुण सुदीहकालं, परिवालियविमलसीलरयणस्स । हे वच्छ! तए भवसुह-कएण विहिओ परिच्चाओ सीलाऽलंकाराऽलं-किओ हु अधणो वि होइ जणपुज्जो। दुस्सीलो पुण धणवंतओ वि सयणेसु वि न पुज्जो विमलं सीलं पालितगाण, चिरकालजीवियं होउ। पावाऽऽसत्ताणं पुण, न किंचि चिरजीवियव्वेण ता भो धम्मगुणाऽऽगर!, गरलं व वमित्तु दुट्ठसीलत्तं । आराहणाकयमणो, मणहरहरिणंऽककरविमलं हयभववंसकरीलं, चित्तचमक्कियसुराऽसुरुप्पीलं। सिवपुरनिवेसकीलं, परिवज्जियजीवपरिपीलं कुगइपहविहियहीलं पावपवित्तीए कयगयनिमीलं । परमपयललणलीलं, परिपालसु निम्मलं सीलं सीलपरिपालणादार-मेवमक्खायमिण्हि सोलसमं । इंदियदमाऽभिहाणं, पडिदारं किंपिदंसेमि इंदो जीवो तस्स उ, इमाणि तेणिदियाणि भण्णंति । नाणाऽऽइगुणसिरीए, स पुण जिओ ललणपासादो तस्स गवक्खाऽऽइपभूय-दारकप्पाणि इंदियाणि धुवं। नियनिययविसयविरमण-कवाडविरहेण पुण तेसु पविसन्तपउरकुवियप्प-कप्पणापावपंसुपूरेण । ओमइलिज्जइ जोण्हु-ज्जला वि नाणाऽऽइगुणलच्छी अहवा अनिरुद्धिदिय-दारे पविसित्तु जीवपासाए। हयविसयचंडचरडा, नाणाऽऽइसिरिं अवहरंति एवमऽवगम्म सम्म, तस्संरक्खणकए कयपयत्तो। सव्वेंदियदाराई, सुनिरुद्धाइं धरसु धीर! ससमयपरसमयमया-ऽवगाहगरुयं पि पंडियं पि नरं। बलवं इंदियगामो, गंजइ अनिरुद्धपडिपसरो धरउ वयं चरउ तवं, सरउ गुरुं झरउ सुत्तअत्थे वि। इंदियदमपरिहीणस्स, तस्स तुसकंडणं सव्वं मयचंडगंडमंडल-करडिघडाविहडणेक्कपडुओ वि । जइ नेव इंदियजई, ता सो च्चिय कायरो पढमो ताव च्चिय गरुयत्तं, ताव च्चिय भुवणभूसणा कित्ती । संभावणा वि पुरिसस्स, ताव जाविदियाणि वसे अह सो च्चिय ताण वसे, जायइ जइ ता कुले जसे धम्मे । संघे गुरुसुहिवग्गे, देइ मसीकुच्चयमऽवस्सं दीणत्तमऽणादेयत्तणं च, सव्वाऽभिसंकणीयत्तं । किं किं तमऽणिटुं जं, इंदियवसगा न पावेंति . भिज्जइ गिरि वि सिरसा, पिज्जइ जालाकरालजलणो वि । खग्गऽग्गे वि चरिज्जइ, दुदमा पुण इंदियतुरंगा
।। ८९४०॥ ॥८९४१ ॥ ॥ ८९४२ ॥ ॥ ८९४३॥ ।। ८९४४॥ ॥८९४५॥ ॥८९४६॥ ॥ ८९४७॥ ॥८९४८॥ ॥ ८९४९ ॥ ॥ ८९५०॥ ॥ ८९५१॥ ॥ ८९५२ ॥ ॥ ८९५३॥ ॥ ८९५४ ॥ ॥८९५५ ॥ ॥ ८९५६॥ ॥ ८९५७ ॥ ॥८९५८ ॥ ॥ ८९५९ ॥ ॥ ८९६०॥ ॥८९६१ ॥ ॥ ८९६२ ॥ ।। ८९६३॥ ॥ ८९६४॥ ॥८९६५ ॥ ॥ ८९६६॥ ॥ ८९६७॥ ॥ ८९६८॥ ।। ८९६९॥ ॥ ८९७०॥ ।। ८९७१ ॥ ॥ ८९७२ ॥ ॥ ८९७३॥ ॥८९७४॥ ॥ ८९७५ ॥
૨૫૩
| SR No. | 022285 |
| Book Title | Samveg Rangshala |
| Original Sutra Author | N/A |
| Author | Vinayrakshitvijay |
| Publisher | Shastra Sandesh |
| Publication Year | 2009 |
| Total Pages | 378 |
| Language | Sanskrit |
| Classification | Book_Devnagari |
| File Size | 17 MB |