________________
६४८]
[विवेकमञ्जरी
धम्माहम्मा पुग्गलजीवाकासा य पंच सुपसिद्धा । अत्थिकाया तम्मयमेयं लोयं वियाणाहि ॥१२१॥ चउदसरज्जुपमाणे लोए ठाणं पि तिलतुससमाणं । तं नत्थि जत्थ जीवा न य पत्ता जम्ममरणाई ॥१२२॥ अन्नाणेण कुसंगेण य कत्थ वि कुमयवासणाए य । दुलहा भवम्मि बोहि विसयपसत्ताण सत्ताण ॥१२३॥ अइदुल्लहो य धम्मायरिओ जीवाण मोहमूढाण । जो साहइ जिणधम्मं अंधाण व मग्गसंचारं ॥१२४॥ धम्मायरिएण विणा जाणंति न मोहनिग्गहोवायं । धम्माभिमुहा वि पुणो पुणो वि जीवा भमंति भवे ॥१२५॥ रे जीव ! कह णु चिंतसि चिंतामणिकामधेणुकप्पतरू । धम्मेणं चिय सव्वाइं हुंति कज्जाइं सज्जाइं ॥१२६॥ भमिहिसि भवम्मि निग्गुण ! जम्मजरामरणपरवसो जीव ! । न कया कया वि तुमए जिणवययरसायणे तण्हा ॥१२७॥ जइ मुणसि पावकम्मं सम्मं दुक्खाण कारणं जीव !। तह वि हु जुज्झ पमाओ निद्धंधस ! धम्मकज्जेसु ॥१२८॥ विहडइ विहवो विहडइ बंधवो विहडए सरीरं पि । तणुपरिचओ वि अंते विहडेइ न जीव ! तुह धम्मो ॥१२९॥ धम्मो चिय तुह जणओ जणणी तुह जीव ! सव्वजीवदया । तुह बंधवो विवेगो परमं मितं च सम्मतं ॥१३०॥ मणसुद्धी पुण दइया उवसमपमुहा गुणा य तुह सयणा । इंदियजओ य पुत्तो सुहबुद्धी तुह पुणो धूया ॥१३१॥ एयं चेव कुटुंबं धरिज्ज हियए करिज्ज मह वयणं । परलोए वि पउत्थं तं न मुयइ जं खणद्धं पि ॥१३२॥ साहम्मियसम्माणं न कयं जिणमंदिरं न उद्धरियं । न य जिणवरवरबिंबं कारवियं जम्म हारवियं ॥१३३॥ पत्ते घरम्मि पत्ते सव्वविसुद्धं विसुद्धसद्धाए । जेण न दिन्नं दाणं कह होही तस्स कल्लाणं ? ॥१३४॥
