________________
શ્લોક ઃ
ॐ ह्रीँ अर्हं नमः ।
ॐ ह्रीँ श्रीशङ्खश्वरपार्श्वनाथाय नमः ।
ૐ નમઃ ।
પૂર્વાચાર્ય વિરચિત
યોગસાર પ્રકરણ
શબ્દશઃ વિવેચન
પ્રથમ પ્રસ્તાવ
યથાવસ્થિતદેવસ્વરૂપોપદેશ
प्रणम्य परमात्मानं रागद्वेषविवर्जितम् ।
योगसारं प्रवक्ष्यामि गम्भीरार्थं समासतः ।।१।।
શ્લોકાર્થ :
રાગ-દ્વેષથી રહિત પ્રકૃષ્ટ આત્મા સ્વરૂપ પરમાત્માને નમસ્કાર કરીને ગંભીર અર્થવાળા યોગસારને હું સંક્ષેપથી કહીશ. ૧
ભાવાર્થ:
ગ્રંથના પ્રારંભમાં ગ્રંથકારશ્રી યોગસારને યોગના સારને, કહેવાની પ્રતિજ્ઞા કરે છે અને તે યોગનો સાર આખા યોગમાર્ગના વર્ણન સ્વરૂપ છે અને તેનો અર્થ અતિગંભીર હોવાથી શબ્દો માત્રથી તેના અર્થની પ્રાપ્તિ થાય તેમ નથી. છતાં સ્વબુદ્ધિ અનુસાર શબ્દોના અવલંબનથી અને સૂક્ષ્મ ઊહથી કંઈક અર્થ પ્રાપ્ત થઈ શકે તેથી તે પ્રકારના સૂક્ષ્મ ગ્રહનો યત્ન કરવા અર્થે ગ્રંથકારશ્રી કહે છે કે યોગનો સાર ગંભીર અર્થવાળો છે તેથી શ્રોતા પણ તે પ્રમાણે ઊહ કરીને તેના કંઈક અર્થને પ્રાપ્ત કરે. વળી, યોગનો સાર આખા યોગમાર્ગ સ્વરૂપ
