________________
Shri Mahavir Jain Aradhana Kendra
www.kobatirth.org
जाव गमणाए तओ सं० गा० दू० । ३३९ । से भिक्खू वागा० दूईज्जमाणे अंतरा से विहं सिया, से जं पुण विहं जाणिज्जा एगाहेण वा दुआहेण तिआहेण वा चउआहेण वा पंचाहेण वा पाउणिज्ज वा नो पाउणिज्ज वा तहय्यगारं विहं अणेगाहगमणिज्जं सइ लाढे जाव गमणाए, केवलीबूया आयाणमेयं, अंतरा से वासे सिया पाणेसु वा पणएसु वा बीएस वा हरि० उद० मट्टियाए वा अविद्धत्थाए, अह भिक्खू जं तह अणेगाह० जाव नो पव० तओ. सं० गा० दू० । ३४० । से भि० गामा० दूइज्जिज्जा० अंतरा से नावासंतारिमे उदए सिया, से जं पुण नावं जाणिज्जा असंजए अभिक्खुपडियाए किणिज वा पामिच्चेज वा नावाए वा नावं परिणामं कट्टु थलाओ वा नावं जलंसि ओगाहिज्जा जलाओ वा नावं थलंसि उक्कसिज्जा पुण्णं वा नावं उस्सिंचिज्जा सन्नं वा नावं उप्पीलाविज्जा तहप्पगारं नावं उड्ढगामिणिं वा अहेगा० तिरियगामि० परं जोयणमेराए अद्धजोयणमेराए अप्पतरे वा भुज्जतरे वा नो दूरूहिज्जा गमणाए ॥ से भिक्खू वा० पुव्वामेव तिरिच्छसंपाइमं नावं जाणिज्जा, जाणित्ता से तमायाए एगंतमवक्कमिज्जा २ भण्डगं पडिलेहिज्जा २ एगओ भोयणभंडगं करिज्जा २ ससीसोवरियं कार्य पाए पमज्जिज्जा सागारं भत्तं पच्चक्खाइज्जा एवं पायं जले किच्चा एवं पायं थले किच्चा तओ सं० नावं दूरू हिज्जा । ३४१ । से भिक्खू वा० नावं दुरूहमाणे नो नावाओ पुरओ दुरूहिज्जा नो नावाओ भग्गओ दुरूहिज्जा नो नावाओ मज्जओ दुरूहिजा नो बाहाओ पगिज्झिय २ अंगुलियाए उद्दिसिय २ ओणमिय २ उन्नमिय २ निज्झाइज्जा, से णं परो नावागओ नावागयं वइज्जा आउसंतो, समणा एवं ता तुमं नावं उक्कसाहि वा वुक्कसाहि वा खिवाहि वा रज्जूयाए वा गहाय आकसाहि, नो से तं परिनं परिजाणिज्जा,
॥ श्री आचाराङ्ग सूत्रं ॥
पू. सागरजी म. संशोधित
८४
Acharya Shri Kailassagarsuri Gyanmandir
For Private And Personal Use Only
