________________
ર૯-૧૦-૭૭ ધર્મનિષ્ઠ દેવગુરધમપાસક સુશ્રાવક ભાઈ શ્રી ઉમેદમલભાઈ તથા શ્રી રસિકભાઈ કોરા તથા શ્રી દામજીભાઈ છેડા આદિ સપરિવાર. સાદર ધર્મલાભ શ્રી ઉમેદમલભાઈ તથા શ્રી દામજીભાઇના હાથના પત્રો મળ્યા છે. વાંચી અત્યંત આનંદ થયો છે. ગુરુવલ્લભની કૃપાનું ફળ છે. પૂજય ગુરુદેવના આશીર્વાદથી આપ સૌની યોજના તૈયાર થઇ છે અને એને પહેલે તબકકે ઘણી સફળતા મળી છે. એ જાણી અત્યંત આનંદ થયો છે. અમારી સૌની પ્રભુ પાસે એ જ પ્રાર્થના છે કે, આપ સૌ કાર્યકર્તાઓને આ શુભ કાર્યમાં પૂર્ણ સફળતા મળો. ગુર વલ્લભની ભાવના દુ:ખી શ્રાવકો, ગરીબ દીન ભાઈઓ, દરેકને રોટી, કપડાં, મકાન, શિક્ષણ, ઔષધ વગેરે સારી રીતે મળે અને ધર્મભાવનામાં સ્થિરતા મેળવી શાસનરસિક બને એવી હતી. એક મહાન ત્યાગી સમર્થ યોગીની ભાવના કદિ ખાલી જતી નથી. વર્ષો પછી પણ ફળે છે. આપ સૌ કોઇ કાર્યકર્તાઓને જેટલા ધન્યવાદ આપું તેટલા ઓછા છે. પત્ર વાંચી તથા શ્રી કિશોરભાઈ પાસે વાત સાંભળીને હૈયું ગદ્ગદ્ થઇ રહ્યું છે. ઘણું જ ગમ્યું છે. હવે ૫૦૦ રહેઠાણ જો જલદી બને તો પછી આપને પૈસા દેવાવાળા સામેથી આવશે. શ્રી જે. આર. શાહ આપણા શ્રાવકર છે. તેઓ આ પ્રમાણે ધગશથી લાગ્યા રહે. બીજા શ્રાવકરત્ન મૂક સેવક શ્રી ઉમેદમલભાઈ અને તેમના બે હાથ શ્રી દામજીભાઇ અને શ્રી રસિકભાઈ ઉપર મને વિશ્વાસ છે. આ કાર્ય જલદી થશે. આપને સફળતા મળો. પૂજય ગુરુદેવના આર્શીવાદ આપની સાથે છે અને રહેશે. શુભ સમાચાર મોકલતા રહેશો. ઘરમાં, પરિવારમાં તથા સૌ ગુરભકતોને અમારા સાદર ધર્મલાભ કહેશો.' સુજયેષ્ઠાશ્રીજી મહારાજ, સુવ્રતાશ્રીજી મહારાજ અને સુયશાશ્રીજી મહારાજ બધાં સુખશાતામાં છે. ધર્મલાભ લખાવે છે. પૂજય શ્રી અરુણવિજયજી મહારાજ તથા તેઓના ગુરુદેવ સૌને અમારી સવિનય વંદના કહેશો. લિ. સાધ્વી મૃગાવતીજીના સાદર ધર્મલાભ. લુધિયાણા
મહત્તરા શ્રી મગાવતીશ્રીજી
