________________
(118) अवहेरिय खलयणु गुणमहंतु । वियहेहिं परायउ पुप्फयंतु । दुग्गम-दीहर-पंथेण-रीणु । णव इंदु जेम देहेण खीणु ॥ ३ ॥ तरु-कुसुम-रेणु-रजिय-समीर । मायंद-गुंछ-गोंदलिय-कीर । णंदणवणे किर वीसमहं जाम । तहि विण्णि पुरिस संपत्तताम ॥४॥ पणवेप्पिणु तेहिं पउत्तु एव । भोखण्डगलिय पावावलेव । परि ममिर भमर रवगुमुगुमंति। किं किर णिवसहि णिजणे वणंति ॥ ५ ॥ करिसर वहिरिय दिञ्चकवाले । पइसरहिण किं पुरवरे विसाले । तं सुणिवि भणइ अहिमाणमेरु । वरि खजउ गिरिकंदर कसेरु ॥ ६ ॥ पउ दुज्जण भउहा वंकियाई । दसिंतु कलुसभावं कियाई ।
॥घत्ता॥ वरु णरवरु धवलच्छिहे, होउ मकुच्छिहे, मरउसोणिमुहणिग्गमे । खलु कुच्छिय पहु वयणई, भिउ डिय णय णई, मणि हालउ सूरुग्गमे ॥७॥ चमराणिल-उड्डावियगुणाएं । अहिसेय-धीय-सुयणत्तणाएं। अविवेयएं दप्पुत्तालियाएं । मोहंधयाएं मारणसीलाएं ॥ ८॥ सत्तंगरजभरभारियाएं । पिंउ-पुत्तर-मण-रसयारियाएं । विससहजम्मएं जडरत्तियाएं । किं लच्छिए विउसविरत्तियाएं ॥९॥ संपइजणु णीरम् णिव्विसेसु । गुणवंतउ जहिं सुरगुरुवि देसु । तहिं अम्हहं लइ काणणु जे सरणु अहिमाणे सुहं वरि होउ मरणु ॥ १०॥ अम्मइय इंदगएहिं सेहिं । आयण्णिय तं पहसियमुहेहिं । गुरु-विणय-पणय-पणविय-सिरेहिं । पडिवयणु दिण्णु णायर णरेहिं ॥११॥
॥ चत्ता ॥ जणमणतिमिरोसारण, मयतरुवारण, णियकुलगयणदिवायर । भोभोकेमवतणुरुह, णवसररुहमुह, कव्वरयणरयणायर ॥ १२ ॥ बंमंडमंडवारूढकित्ति । अणवस्य रइय जिणणाहमत्ति । सुहतुंगदेवकमकमलमसलु । णीसेसकलाविण्णाणकुसल ॥ १३ ॥ पाययकइकव्व रसावलुद्ध । संपीयसरासइसुरइदुद्ध । कमलच्छु अमच्छरु सच्चसंधु । रणभरधुरधरणुग्घिट्टखंधु ॥ १४ ॥ सविलासविलासिणिहिययथेणु । सुपसिद्ध महाकइकामघेणु। काणीणदीणपरिपूरियासु । जसपसरपहासियदसदिसासु ॥ १५ ॥ पररमणिपरम्मुहु सुद्धसील । उण्णयमइ मुयणुद्धरणलील । गुरुयणपयपणवियउत्तमंगु । सिरिदेविसंवगन्भुन्भवंगु ॥ १६ ॥
