________________
५६८
सुत्तागमे
[जंबुद्दीवपण्णत्ती भद्दसण्णिवेसे य बहुविसेसे उइंडियदेवकोट्ठदारुगिरिखायवाहणविभागकुसले इय तस्स बहुगुणड्डे थवई रयणे णरिंदचंदस्स । तवसंजमणिविढे किं करवाणीतुवट्ठाई ॥१॥ सो देवकम्मविहिणा खंधावारं णरिंदवयणेणं । आवसहभवणकलियं करेइ सव्वं मुहत्तेणं ॥ २॥ करेत्ता पवरपोसहघरं करेइ २ ता जेणेव भरहे राया जाव एयमाणत्तियं खिप्पामेव पञ्चप्पिणइ, सेसं तहेव जाव मजणघराओ पडिणिक्खमइ २ त्ता जेणेव बाहिरिया उवट्ठाणसाला जेणेव चाउग्घंटे आसरहे तेणेव उवागच्छइ ॥ ४७ ॥ तए णं तं धरणितलगमणलहुं तओ बहुलक्खणपसत्थं हिमवंतकंदरंतरणिवायसंवडियचित्ततिणिसदलियं जंबूणयसुकयकूबरं कणयदंडियारं पुलयवरिंदणीलसासगपवालफलिहवररयणलेट्ठमणिविडुमविभूसियं अडयालीसाररइयतवणिज्जपट्टसंगहियजुत्ततुंब पघसियपसियणिम्मियणवपट्टपुट्ठपरिणिठियं विसिठ्ठलट्ठणवलोहबद्धकम्मं हरिपहरणरयणसरिसचक्कं कक्केयणइंदणीलसासगसुसमाहियबद्धजालकडगं पसत्थविच्छिण्णसमधुरं पुरवरं च गुत्तं सुकिरणतवणिजजुत्तकलियं कंकटयणिजुत्तकप्पणं पहरणाणुजायं खेडगकणगधणुमंडलग्गवरसत्तिकोंततोमरसरसयबत्तीसतोणपरिमंडियं कणगरयणचित्तं जुत्तं हलीमुहबलागगयदंतचंदमोत्तियतणसोल्लियकुंदकुडयवरसिंदुवारकंदलवरफेणाणगरहारकासप्पगासधवलेहिं अमरमणपवणजइणचवलसिग्घगामीहिं चउहिं चामराकणगविभूसियंगेहिं तुरगेहिं सच्छत्तं सज्झयं सघंटं सपडागं सुक्यसंधिकम्मं सुसमाहियसमरकणगगंभीरतुल्लघोसं वरकुप्परं सुचकं वरणेमीमंडलं वरधारातोंडं वरवइरबद्धतुंबं वरकंचणभूसियं वरायरियणिम्मियं वरतुरगसंपउत्तं वरसारहिसुसंपग्गहियं वरपुरिसे वरमहारहं दुरूढे आरूढे पवररयणपरिमंडियं कणयखिंखिणीजालसोभियं अउज्झं सोयामणिकणगतवियपंकयजासुयणजलणजलियसुयतोडरागं गुंजद्धबंधुजीवगरत्तहिंगुलगणिगरसिंदूररुइलकुंकुमपारेवयचलणणयणकोइलदसणावरणरइयाइरेगरत्तासोगकणगकेसुयगयतालुसुरिंदगोवगसमप्पभप्पगासं बिंबफलसिलप्पवालउटुिंतसूरसरिसं सव्वोउयसुरहिकुसुमआसत्तमल्लदामं ऊसियसेयज्झयं महामेहरसियगंभीरणिद्धघोसं सत्तुहिययकंपणं पभाए य सस्सिरीयं णामेणं पुहविविजयलभंति विस्सुयं लोगविस्सुयजसोऽहयं चाउग्घंटं आसरहं णरवई दुरूढे, तए णं से भरहे राया चाउरघंटे आसरहं दुरूढे समाणे सेसं तहेव दाहिणाभिमुहे वरदामतित्थेणं लवणसमुदं ओगाहइ जाव से रहवरस्स कुप्परा उल्ला जाव पीइदाणं से, णवरं चूडामणिं च दिव्वं उरत्थगेविज्जगं सोणियसुत्तगं कडगाणि य तुडियाणि य जाव दाहिणिल्ले अंतवाले जाव अट्ठाहियं महामहिमं करेंति २ त्ता एयमाणत्तियं पञ्चप्पिणति, तए णं से दिव्वे चक्करयणे वरदामतित्यकुमारस्स देवस्स अट्ठाहियाए महामहिमाए णिव्वत्ताए समाणीए
