________________
१०५२
सुत्तागमे
[उत्तरज्झयणसुत्तं ॥ ५८ ॥ पणयालसयसहस्सा, जोयणाणं तु आयया । तावइयं चेव वित्थिण्णा, तिगुणो साहियपरिरओ ॥ ५९ ॥ अट्ठजोयणबाहल्ला, सा मज्झंमि वियाहिया । परिहायंती चरिमंते, मच्छिपत्ताउ तणुयरी ॥ ६० ॥ अजुणसुवण्णगमई, सा पुढवी निम्मला सहावेण । उत्ताणगच्छत्तगसंठिया य, भणिया जिणवरेहिं ॥ ६१ ॥ संखंककुंदसंकासा, पंडुरा निम्मला सुहा । सीयाए जोयणे तत्तो, लोयंतो उ वियाहिओ ॥ ६२ ॥ जोयणस्स उ जो तत्थ, कोसो उवरिमो भवे । तस्स कोसस्स छब्भाए, सिद्धाणोगाहणा भवे ॥ ६३ ॥ तत्थ सिद्धा महाभागा, लोगग्गंमि पइट्ठिया । भवपवंचओ मुक्का, सिद्धिं वरगइं गया ॥ ६४ ॥ उस्सेहो जस्स जो होइ, भवंमि चरिमंमि उ । तिभागहीणो तत्तो य, सिद्धाणोगाहणा भवे ॥६५॥ एगत्तेण साईया, अपज्जवसिया वि य । पुहत्तेण अणाईया, अपजवसिया वि य ॥ ६६ ॥ अरूविणो जीवघणा, नाणदंसणसन्निया । अउलं सुहं संपत्ता, उवमा जस्स नत्थि उ ॥ ६७ ॥ लोगेगदेसे ते सव्वे, नाणदंसणसन्निया । संसारपारनित्थिण्णा, सिद्धिं वरगई गया ॥ ६८ ॥ संसारत्था उ जे जीवा, दुविहा ते वियाहिया । तसा य थावरा चेव, थावरा तिविहा तहिं ॥ ६९ ॥ पुढवी आउजीवा य, तहेव य वणस्सई । इच्चेए थावरा तिविहा, तेसिं भेए सुणेह मे ॥ ७० ॥ दुविहा य पुढवीजीवा, सुहुमा बायरा तहा। पजत्तमपजत्ता, एवमेव दुहा पुणो ॥ ७१ ॥ बायरा जे उ पजत्ता, दुविहा ते वियाहिया। सण्हा खरा य बोधव्वा, सण्हा सत्तविहा तहिं ॥ ७२ ॥ किण्हा नीला य रुहिरा य, हालिद्दा सुकिला तहा । पंडुपणगमट्टिया, खरा छत्तीसईविहा ॥७३॥ पुढवी य सक्करा वालुया य, उवले सिला य लोणूसे । अयतंबतउयसीसग-, रुप्पसुवण्णे य वइरे य ॥ ७४ ॥ हरियाले हिंगुलए, मणोसिला सासगंजणपवाले। अब्भपडलब्भवालय, बायरकाए मणिविहाणे ॥ ७५ ॥ गोमेज्जए य रुयगे, अंके फलिहे य लोहियक्खे य । मरगयमसारगल्ले, भुयमोयगइंदनीले य ॥ ७६ ॥ चंदणगेरुयहंसगब्भे, पुलए सोगंधिए य बोधव्वे । चंदप्पहवेरुलिए, जलकंते सूरकंते य ॥ ७७ ॥ एए खरपुडवीए, भेया छत्तीसमाहिया। एगविहमणाणत्ता,
हुमा तत्थ वियाहिया ॥ ७८ ॥ सुहुमा सव्वलोगंमि, लोगदेसे य बायरा । इत्तो कालविभागं तु, वुच्छं तेसिं चउव्विहं ॥ ७९ ॥ संतई पप्पडणाईया, अपज्जवसिया वि य । ठिइं पडुच्च साईया, सपजवसिया वि य ॥ ८० ॥ बावीससहस्साई, वासाणुकोसिया भवे । आउठिई पुढवीणं, अंतोमुहुत्तं जहन्निया ॥ ८१ ॥ असंखकालमुक्कोसा, अंतोमुहुत्तं जहन्निया । कायठिई पुढवीणं, तं कायं तु अमुंचओ ॥ ८२ ॥ अणंतकालमुक्कोसं, अंतोमुहुत्तं जहन्नयं । विजढंमि सए काए, पुढविजीवाण
