________________
१२
उत्तरज्झयणं
पंचविसइमं अज्झयणं
जन्नइज्ज
माहणकुलसंभूओ आसि विप्पो महायसो। जायाई जमजन्नमि जयघोसे त्ति नामओ ॥ १ ॥ इन्दियग्गामनिग्गाही मग्गगामी महामुणी। गामाणुगामं रीयन्ते पत्ते वाणारसिं पुरि ।। २ ।। वाणारसीए वहिया उज्जाणंमि मणोरमे। फासुए सेज्जसंथारे तत्थ वासमुवागए ।। ३ ।। अह तेणेव कालेणं पूरीए तत्थ माहणे । विजयघोसे त्ति नामेण जन्नं जयइ वेयवी ।। ४ ।।
अह से तत्थ अणगारे मासक्खमणपारणे। विजयघोसस्स जन्नंमि भिक्खमट्ठा उवटिए ॥ ५ ॥ समुवट्टियं तहिं सन्तं जायगो पडिसेहए। न हु दाहामि ते भिक्खं भिक्खू जायाहि अन्नओ ।। ६ । जे य वेयविऊ विप्पा, जन्नट्ठा य जे दिया। जोइसंगविऊ जे य, जे य धम्माण पारगा ।। ७ ।। जे समत्था समुद्धत्तु परं अप्पाणमेव य । तेसिं अन्नमिणं देयं भो भिक्खू सव्वकामियं ॥ ८ ॥ सो एवं तत्थ पडिसिद्धो जायगेण महामुणी। न वि रुढो न वि तुट्ठो उत्तमढगवेसओ ।। ६ ॥
