________________
(१.१.१०-१०)
१. ब्रह्मजालसुत्तं
१०. "बीजगामभूतगामसमारम्भा पटिविरतो समणो गोतमो"ति- इति वा हि, भिक्खवे...पे०...।
" ‘एकभत्तिको समणो गोतमो रत्तूपरतो विरतो विकालभोजना। नच्चगीतवादितविसूकदस्सना पटिविरतो समणो गोतमो । मालागन्धविलेपनधारणमण्डनविभूसनट्ठाना पटिविरतो समणो गोतमो । उच्चासयनमहासयना पटिविरतो समणो गोतमो । जातरूपरजतपटिग्गहणा पटिविरतो समणो गोतमो । आमकधञ्जपटिग्गहणा पटिविरतो समणो गोतमो । आमकमंसपटिग्गहणा पटिविरतो समणो गोतमो । इत्थिकुमारिकपटिग्गहणा पटिविरतो समणो गोतमो । दासिदासपटिग्गहणा पटिविरतो समणो गोतमो । अजेळकपटिग्गहणा पटिविरतो समणो गोतमो । कुक्कुटसूकरपटिग्गहणा पटिविरतो समणो गोतमो । हत्थिगवस्सवळवपटिग्गहणा पटिविरतो समणो गोतमो । खेत्तवत्थुपटिग्गहणा पटिविरतो समणो गोतमो । दूतेय्यपहिणगमनानुयोगा पटिविरतो समणो गोतमो । कयविक्कया पटिविरतो समणो गोतमो । तुलाकूटकंसकूटमानकूटा पटिविरतो समणो गोतमो । उक्कोटनवञ्चननिकतिसाचियोगा पटिविरतो समणो गोतमो ।
छेदनवधबन्धनविपरामोसआलोपसहसाकारा पटिविरतो समणो गोतमो'ति - इति वा हि, भिक्खवे, पुथुज्जनो तथागतस्स वण्णं वदमानो वदेय्य ।
चूळसीलं निहितं ।
Jain Education International
For Private & Personal Use Only
www.jainelibrary.org
