________________
प्रश्नव्याकरण सुत्तं
पढमो सुयखंधो
आसवदारं
पढमं अज्झयणं - पढमं आसवदारं
हिंसा
९ तेणं कालेणं तेणं समएणं चम्पा णामं णयरी होत्था । पुण्णभद्दे चेइए । वणसंडे ।
असोगवरपायवे । पुढविसिलापट्टए ।
तत्थ णं चम्पाए णयरीए कोणिए णामं राया होत्था । धारिणी देवी ।
तेणं कालेणं तेणं समएणं समणस्स भगवओ महावीरस्स अंतेवासी अज्जसुहम्मे णामं थेरे जाइ संपण्णे जाव पंचहिं अणगारसएहिं सद्धिं संपरिवडे पुव्वाणुपुव्विं चरमाणे गामाणुगामं दूइज्जमा जेणेव चम्पा णयरी तेणेव उवागच्छइ जाव संजमेणं तवसा अप्पाणं भावेमाणे विहरइ । तेणं कालेण तेणं समएणं अज्जसुहम्मस्स अंतेवासी अज्जजंबू णामं अणगारे कासवगोत्तेणं जाव संजमेणं तवसा अप्पाणं भावेमाणे विहरइ ।
तए णं से अज्जजंबू जायसड्ढे जाव जेणेव सुहम्मे थेरे तेणेव उवागच्छ्इ उवागच्छित्ता अज्जसुहम्मं थेरं तिक्खुत्तो आयाहिणं पयाहिणं करेइ, करित्ता वंदइ णमंसइ, वंदित्ता णमंसित्ता णच्चासण्णे णाइदूरे विणएणं पंजलिउडे पज्जुवासमाणे एवं वयासी
जड़ णं भंते ! समणेणं भगवया महावीरेणं जाव संपत्तेणं णवमस्स अंगस्स अणुत्तरोववाइयदसाणं अयमट्ठे पण्णत्ते, दसमस्स णं अंगस्स पण्हावागरणाणं समणेणं भगवया महावीरेण जाव संपत्तेणं के अट्ठे पण्णत्ते ?
जंबू ! दसमस्स अंगस्स समणेणं भगवया महावीरेणं जाव संपत्तेणं दो सुयक्खंधा पण्णत्ताआसवदारा य संवरदारा य ।
पढमस्स णं भंते ! सुयक्खंधस्स समणेणं जाव संपत्तेणं कइ अज्झयणा पण्णत्ता ?
जंबू ! पढमस्स सुयक्खंधस्स समणेणं भगवया महावीरेणं जाव संपत्तेणं पंच अज्झयणा
पण्णत्ता ।
दोच्चस्स णं भंते ! सुयक्खंधस्स ? एवं चेव जाव पंच अज्झयणा पण्णत्ता ।
एएसि णं भंते! अण्हय-संवराणं समणेणं भगवया महावीरेणं जाव संपत्तेणं के अट्ठे पण्णते ? तए णं अज्जसुहम्मे थेरे जंबूणामेणं अणगारेणं एवं वुत्ते समाणे जंबू अणगारं एवं वयासी-एवं खलु जंबू !
इणमो अण्हय-संवर विणिच्छयं, पवयणस्स णिस्संदं । वोच्छामि णिच्छयत्थं, सुभासियत्थं महेसीहिं ॥१॥ पंचविहो पण्णत्तो, जिणेहिं इह अण्हओ अणाईओ । हिंसामोसमदत्तं अब्बंभपरिग्गहं चेव ॥२॥ जारिसमो जं णामा, जह य कओ जारिसं फलं देइ ।
1
