Page Text
________________
प्रश्नव्याकरण सुत्तं
विराहणाओ । चत्तारि कसाया झाण-सण्णा-विकहा तहा य हंति चउरो | पंच य किरियाओ समिइ-इंदिय-महव्वयाइं च । छज्जीवणि- काया, छच्च लेसाओ । सत्त भया । अट्ठ य मया । णव चेव य बंभचेरवयगत्ती। दसप्पगारे य समणधम्मे | एग्गारस य उवासगाणं पडिमा । बारस य भिक्खुपडिमा तेरस किरियाठाणा य । चउद्दस भूयगामा | पण्णरस परमाहम्मिया । गाहा सोल-सया । सत्तरस असंजमे | अट्ठारस अबंभे
सइ णायज्झयणा | वीसं असमाहिट्ठाणा । एगवीसा य सबला य | बावीसं परिसहा य । तेवीसए सूयगडज्झयणा । चउवीसविहा देवा। पण्णवीसाए भावणा | छव्वीसा दसाकप्पववहाराणं उद्देसण- काला | सत्तावीसा अणगारगुणा | अट्ठावीसा आयारपकप्पा | एगुणतीसा पाव-सुया | तीसं मोहणीयट्ठाणा | एगतीसाए सिद्धाइगुणा। बत्तीसा य जोगसंग्गहे । तित्तीसा आसायणा । एक्काइयं करित्ता एगुत्तरियाए वुड्ढीए तीसाओ जाव उ भवे तिगाहिया विरइपणिहीसु य एवमाइसु बहुसु ठाणेसु जिणपसत्थेसु अवितहेसु सासयभावेसु अवविएसु संकं कंखं णिराकरित्ता सद्दहए सासणं भगवओ अणियाणे अगारवे अलुद्धे अमूढमणवयणकायगुत्ते । जो सो वीरवर-वयण-विरइ पवित्थरबहुविहिप्पयारो सम्मत्त- विसुद्धमूलो धिइकंदो विणयवेइओ णिग्गय-तेल्लोक्क-विउलजस-णिविड-पीण-पवर सु जायखंधो पंचमहव्वय-विसालसालो भावणतयंतज्झाण-सुहजोग-णाणपल्लव वरंकुरधरो बहुगुणकुसुमसमिद्धो सील-सुगंधो अणण्हवफलो पुणो य मोक्खवर बीजसारो मंदरगिरि-सिहर-चूलिआ इव इमस्स मोक्खवरमुत्तिमग्गस सिहरभूओ संवरवर-पायवो चरिमं संवरदारं । जत्थ ण कप्पड़ गामागर-णगर-खेड-कब्बड-मडंब-दोणमुह-पट्टणा- समगयं च किंचि अप्पं वा बहू वा अणुं वा थूलं वा तसथावरकायदव्वजायं मणसा वि परिघेत्तुं, ण हिरण्णसुवण्णखेत्तवत्थं, ण दासी-दास-भयग-पेस- हय- गय-गवेलगं च, ण जाण-जुग्ग-सयणासणाइ, ण छत्तगं, ण कुंडिया, ण उवाणहा, ण पेहुण-वीयण -तालियंटगा, ण यावि अय-तउय-तंब-सीसग-कंस-रयय-जायरूवमणिमुत्ताहारपुडग-संख-दंत-मणि-सिंग-सेल-काय-वरचेल-चम्मपत्ताइं महरिहाइं परस्स अज्झोववाय-लोहजणणाइं परियड्ढेउं गुणवओ, ण यावि पुप्फ-फल-कंद-मूलाइयाइं सणसत्तरसाइं सव्वधण्णाइं तिहिं वि जोगेहिं परिघेत्तुं ओसह-भेसज्जभोयणट्ठयाए संजएणं । किं कारणं ? अपरिमिय णाणदंसणधरेहिं सीलगुणविणयतवसंजमणायगेहितित्थयरेहिं सव्वजगज्जीववच्छलेहिं तिलोयमहिएहिं जिणवरिंदेहिं एस जोणी जंगमाणं दिट्ठा । ण कप्पइ जोणिसमुच्छेओ त्ति तेण वज्जंति समणसीहा । जं पि य ओयणकुम्मास-गंज-तप्पण-मंथु-भुज्जिय-पलल-सूव-सक्कुलि-वेढिम-वरसरकचण्णकोसग-पिंड-सिहरिणि-व-मोयग-खीर-दहि-सप्पि-णवणीय-तेल्ल-गड-खंड-मच्छंडिय-मह खज्जग-विहिमाइयं पणीयं उवस्सए परघरे व रण्णे ण कप्पइ तं वि सण्णिहिं काउं सुविहियाणं। जं पि य उद्दिट्ठ-ठविय-रइयग-पज्जवजायं पकिण्णं पाउकरण-पामिच्चं मीसगजायं कीयगडं पाहुडं च दाणट्ठपुण्णपगडं समणवणीमगट्ठयाए वा कयं पच्छाकम्मं पुरेकम्म, णिइकम्मं मक्खियं अइरित्तं मोहरं चेव सयंगाहमाहडं मट्टिओवलितं, अच्छेज्जं चेव अणीसहूं जं तं तिहिसु जण्णेसु
| SR No. | 009910 |
| Book Title | Agam 10 Ang 10 Prashna Vyakaran Sutra Mool Sthanakvasi |
| Original Sutra Author | Sudharmaswami |
| Author | Devardhigani Kshamashaman |
| Publisher | Global Jain Agam Mission |
| Publication Year | 2012 |
| Total Pages | 45 |
| Language | Prakrit |
| Classification | Book_Devnagari, Agam, Canon, & agam_prashnavyakaran |
| File Size | 3 MB |