Page Text
________________
w
प्रश्नव्याकरण सुत्तं
वेरविरामणपज्जवसाणं, सव्वसमुद्दमहोदहितित्थं ॥१॥ तित्थयरेहि सुदेसियमग्गं, णरयतिरिच्छविवज्जियमग्गं । सव्वपवित्तिसुणिम्मियसारं, सिद्धिविमाणअवंगुयदारं ॥२॥ देव-णरिंद-णमंसियपूयं, सव्वजगुत्तममंगलमग्गं । दुद्धरिसं गुणणायगमेक्कं, मोक्खपहस्स वडिंसगभूयं ॥३॥ जेण सुद्धचरिएण भवइ सुबंभणो सुसमणो सुसाहू । स इसी, स मुणी, स संजए, स एव भिक्खु, जो सुद्धं चरइ बंभचेरं । इमं च रइ-राग-दोस - मोह-पवड्ढणकरं, किं मज्झ-पमायदोसपासत्थसील करणं अब्भंगणाणि य तेल्लमज्जणाणि य अभिक्खणंकक्ख-सीस-कर-चरण वयण-धोवणसंबाहण-गायकम्म-परि मद्दणा णुलेवण- चुण्णवास-धुवण सरीर-परिमंडण - बाउसिय-हसिय-भणियणट्ट-गीय-वाइय-णडणट्टग जल्ल मल्ल पेच्छण - वेलंबगं जाणि य सिंगारागाराणि य अण्णाणि य एवमाइयाणि तव-संजम - बंभचेर - घाओवघाइयाइं अणुचरमाणेणं बंभचेरं वज्जियव्वाइं सव्वकालं । भावियव्वो भवइ य अंतरप्पा इमेहिं तव णियम सील जोगेहिं णिच्चकालं । किंत ? अण्हाणगअदंतधावण-सेय-मल-जल्लधारणं मूणवय-केसलोय - खम-दम-अचेलग-खुप्पिवासलाघव-सीउसिणकट्ठसिज्जा-भूमिणिसिज्जा-परघरपवेस-लद्धावलद्ध-माणावमाण- णिंदण- दंसमसग फास-णियम-तवगुण-विणय-माइएहिं जहा से थिरतरगं होइ बंभचेरं ।
इमं च अबंभचेर-विरमण - परिरक्खणट्टयाए पावयणं भगवया सुकहियं अत्तहियं पेच्चाभावियं आगमेसिभद्दं सुद्धं णेयाउयं अकुडिलं अणुत्तरं सव्वदुक्ख- पावाणं विउसमणं ।
तस्स इमा पंच भावणाओ चउत्थवयस्स होंति अबंभचेरविरमण - परिरक्ख णट्टयाए ।
पढमं-सयणासण-घर-दुवार - अंगण आगास- गवक्ख-साल-अभिलोयणपच्छवत्थुग-पसाहणगण्हाणिगावगासा, अवगासा जे य वेसियाणं, अच्छंति य जत्थ इत्थियाओ अभिक्खणं मोहदोसरइराग- वड्ढणीओ, कहिंति य कहाओ बहुविहाओ, ते वि हु वज्जणिज्जा । इत्थि-संसत्त संकिलिट्ठा, अण्णे वि य एवमाई अवगासा ते हु वज्जणिज्जा |
जत्थ मणोविब्भमो वा भंगो वा भंसणा [भसंगो] वा अहं रुद्दं च हुज्ज झाणं तं तं वज्जेज्जऽवज्जभीरू अणाययणं अंतपंतवासी ।
एवमसंसत्तवासवसही समिइ - जोगेण भाविओ भवइ अंतरप्पा, आरयमण - विरयगामधम्मे जिइंदि बंभचेरगुत्ते ।
बिइयं - णारीजणस्स मज्झे ण कहियव्वा कहा - विचित्ता विब्बोय - विलास- संपउत्ता हाससिंगारलोइयकहव्व मोहजणणी, ण आवाह - विवाह-वर कहा, इत्थीणं वा सुभग-दुब्भगकहा, चउसट्ठि च महिलागुणा, ण वण्ण- देस जाइ - कुल-रूव णाम - णेवत्थ- परिजण - कहा इत्थियाणं, अण्णा वि य एवमाइयाओ कहाओ सिंगार - कलुणाओ, तवसंजमबंभचेरघाओवघाइयाओ अणुचरमाणेणं बंभचेरं ण कहियव्वा, ण सुणियव्वा, ण चिंतियव्वा ।
एवं इत्थीकहाविरइसमिइजोगेणं भाविओ भवइ अंतरप्पा आरयमण-विरयगामधम्मे जिइंदि बंभचेरगुत्ते ।
1 तइयं-णारीणं हसिय-भणिय-चेट्ठिय-विप्पेक्खिय-गइ-विलास-कीलियं, विब्बोइय-णट्ट-गीय-वाइयसरीर-संठाण-वण्ण-कर-चरण-णयण लावण्ण-रूव-जोव्वण- पयोहराधर वत्थालंकार-भूसणाणि य,
33
| SR No. | 009910 |
| Book Title | Agam 10 Ang 10 Prashna Vyakaran Sutra Mool Sthanakvasi |
| Original Sutra Author | Sudharmaswami |
| Author | Devardhigani Kshamashaman |
| Publisher | Global Jain Agam Mission |
| Publication Year | 2012 |
| Total Pages | 45 |
| Language | Prakrit |
| Classification | Book_Devnagari, Agam, Canon, & agam_prashnavyakaran |
| File Size | 3 MB |